Berlin-ah England-in Germany an tlawm

England manager Roy Hodg-son-a'n World champion Germany hmaah team thar a din ngam a, Olympiastadion-ah Toni Kroos leh Mario Gomez hmangin mualneituin hma hruai mah se England-in Harry Kane, Jamie Vardy leh Eric Dier goal hmangin an lehthal. Friendly match ni mah se England hneh hi Germany an nih tlat avangin Hodgson-a'n inkhelh bana England manager a nih hun chhunga a hun tawn ropui ber a tih chu a mak lo.

Kum 86 a tling ta

Germany leh England te an intawn hmasak ber aṭangin kum 86 a tling ta a, England tan lawmna tur awm zeuh zeuh mah se lungaihna tur a tam zawk.

Paul Gascoigne-a mittui te, Gerd Muller-a scissors kick, Gareth Southgate penalty hlah, Andreas Moller-a celebrate dan dangdai takte, Michael Owen-a hattrick, Bobby Moore-a'n 1966 World Cup nomawi a chawite chu ram pahnih inkhelh ṭuma thil thleng tam tak zinga langsar zual a ni a. Chuvangin tum ṭuma an inkhelhna pawh hi friendly match anga en liam theih a ni lo.

England an ṭha?

Inelna tak taka an chet--
ṭhat ngai chuang loh avangin England fak hluai hi a la harsa a, chutihrualin beisei nei takin Euro 2016 erawh an khel ang.

Kum 19-a upa Spurs midfielder Dele Alli-a'n ram tana vawi nga a khelhnaah a rintlak tih a pho chhuak a. England captain hlui Bryan Robson nen khaikhin a ni hial.

Captain Wayne Rooney awm lo mah se Kane-a'n in-nghahna tlak a ni tih a pho lang a, Premier League-a che ṭha Vardy-a'n ram tana a goal hmasa ber a khung. England tana goal khungtute hi Premier League-a hmahruaitu Leicester leh Tottenham Hots-purs player-te an ni a, chu chuan an result thui tak a sawi.

Eng nge an sawi?

England manager Roy Hodg--son chuan, "Germany ang team hi chu nitin kan hneh ngai lo a, England manager ka nih chhunga kan hun tawn ropui ber a ni. Kan khelh ṭhat zawk avangin first half-a 1-0 a kan chak lo zawk kha chu kan vanduaiah ka ngai a, 2-0 a nih leh kha chu kan vanduai lehzual. A tawpah erawh kan phu ang ngeiin goal thum kan khung a, player-ten fak an phu a ni," tiin an khelh ṭhat thu a sawi.

Germany manager Joachim Low chuan, "Goal hnih khung hnua inlehthaltir leh chu coach tan chuan hriatthiam har tak a ni. Minute 60 kan khelṭha a, European Championship-ah chuan minute 90 chhung kan khelh-ṭhat a ṭul tawh ang," tiin a sawi.