Nadal leh Federer An inhnukdawk

Miami Open khelh mekah Rafael Nadal chu a match hmasa ber khel zo thei loin a inhnukdawk a, Roger Federer pawh a khup zai a nih hnua a vawi khat nan inkhelh tum mah se hrisel lohna vangin a inlan thei ta chuang lo.

Nimin khan Grand Slam vawi 14 champion tawh Nadal hian a match hmasa ber khelin world number 94 Da-mir Dzumhur nen an inhma-chhawn a, seeded pangana Nadal hian darkar khat leh minute 50 an inhamchawn chhungin set khatna lain set hnihna a hloh thung a, 2-6, 6-4, 3-0 a nih laiin a lu hai vangin a inkhel tluan thei ta lo a ni.

Spanish thiampuipa Nadal hi hliam leh hrisel lohna vangin a inkhel tluan thei lo khat hle a, kum ruk chhunga a vawi khat nan a inkhel tluan thei lo a ni. Inkhelh laia harsatna vanga a inhnuhdawh hnuhnung ber chu 2010 Australian Open quarter-final a Andy Murray nen an inhmachhawn ṭum daih tawh kha a ni nghe nghe.

Kum 29-a upa Nadal chuan, "Set khatna kan khelh lai kha chuan har-satna ka nei lo a, mah-se set hnihna aṭang khan ka lu a hai bakah thawk lamah harsatna ka nei. Doctor ko mah ila awmzia a awm thui loh avangin inkhelh tluan duh hle mah ila ka thei ngang lo. Harsatna lian tham a nih loh hram erawh ka beisei," tiin a sawi.

Australian Open semifinal-a a chak loh hnua inlan leh beisei Federer chu a pum chian loh vangin a inkhel thei lo bawk a, Swiss thiampuipa hi Juan Martin del Potro hmachhawn tur a ni a, a inlan thei lo.

Miami Open nomawi vawi hnih lo chawi tawh Federer chuan, "He hmuna inkhel tura lo kir hi ka duh em em a, mahse inelna
ṭan hma darkar 24 chauh a awm tawh tihah ka pumah harsatna ka neih avangin ka inlan thei ta lo a ni. Fan-te chungah ka inthlahrung em em a, a chhan chu tun hmain hetiang hun tepter tawh takah hian ka la inhnukdawk ngai lo a ni," tiin a sawi.

A ban rek na vanga kum khat dawn a inkhelh theih loh hnua kumina lo kir leh Del Potro hian second round-ah Horacio Zeballos hmachhawnin 6-4, 6-4 in a chak lo thung a ni.

Inkhel dangah beisei loh result kan hmu a, French Open champion lai Stan Wawrinka chu Andrey Kuznetsov lakah 6-4, 6-3 in a chak lo a ni.

Murray a chak

Player langsar pahnih Nadal leh Federer ten harsatna an tawh avangin chak result hlawhchhuak thei loin Wawrinka chak lo nghal mah se Andy Murray erawhin hnehna a chang thung. Briatian number 1 hian a match hmasa berah Denis Istomin chu darkar khat leh minute 33 chhungin 6-3, 7-5 in a hneh.