Brazil leh Uruguay inhnehtawk

Luis Suarez chu 2014 World Cup hnua a vawi khat nan Uruguay tan a inlan ve leh ta a, Brazil lakah goal khat khungin khualmualah Brazil chu 2-2 in an va inhnehtawkpui.

Zirtawpni zan Pernambuco Arena-a 2018 FIFA World Cup qualification (CONMEBOL) inkhelah ṭan aṭanga second 39 lekah Brazil defender Douglas Costa chuan goal hmahruai a khung a. Captain Neymar chuan freekick aṭangin goal a khung chhunzawm teuh hle a, mahse goal hrulah a kal hlauh. Minute 26-naah midfielder Renato Augusto-a'n an goal hnihna a khung zui mai bawk avangin Dunga naute hi awlsam taka chak tur niin an lang hman.

Amaherawhchu, Paris St-Germain forward Edinson Cavani chuan minute 30-naah an si phurh a sut ṭhen. Tun season-a Barcelona tana goal 43 khung tawh Suarez chuan second half ṭan tirhah an goal hnihna khungin goal dang a lut zui tawh lo.

Kum 28-a upa Suarez hian midfielder Alvaro Pereira hnen aṭanga a through ball hmuh chu rang takin Brazil goal-ah a chhuih thut a, defender David Luiz a ti hawihai chiang hle.

Barca striker Suarez hi 2014 World Cup group match hnu-hnung bera Italian defender Giorgio Chiellini a seh avangin match kaw chhung international match khel thei lo tur a hrem a ni a, Uruguay tan ni 640 zet a inlan loh hnua a inkhelh lehna hmasa berah point khat hlu tak a hlawhchhuah pui.

Liverpool striker hlui hian hrem vangin World Cup-a an match hnuhung bera Colombia an hneh loh bakah 2015 Copa America zawng leh 2018 World Cup qualifying match hmasa pali zet a khel thei lo a ni.

Inkhel boruak ṭang takah Barca player duhlai Neymar leh Suarez te chu Argentine referee Nestor Fabian Pitana-a'n yellow card a pe ve ve. Brazil captian Neymar hian Thawhlehni zana Paraguay an hmachhawn hunah a inlan theih dawn loh phah. Mahse, Catalan club tan erawh kartawpa El Clasico an khelh dawn avangin an forward inkhel hah lo tur hi chanchin lawmawm a ni thung ang.

Uruguay hian match nga an khelh tawh aṭangin vawi thum hnehna an chang tawh a, vawi khat an khingpuite nen inhnehtawkin Ecuador an hneh lo tawh thung. Point 10 hmuin table-ah pahnihna dinhmun an luah a, pakhatna Ecuador chu point thumin an phak lo mek. Hetihlai hian Brazil erawh khelh zat inangah point riat hmuin pathumna dinhmun luah mah se Paraguay leh Argentina te nen an point hmuh zat a intluk thung.

Eng nge an sawi?

Brazil coach Dunga chuan, "Bul kan ṭan fuh zawk a, hun chanve hmalam kha chu kan chan a ni a, a hnulam erawh an chan a ni thung. Uruguay nena inkhelh hi chu a awlsam ngai lo a, tlarhmaah Cavani leh Suarez te an rawn ding a nih tawh chuan a harsa lehzual ṭhin," tiin an khingpui hmatawng pahnih a fak.

Goal hnuhnung ber khungtu Suarez chuan, "Minute khat pawh ral hmaa goal an rawn khung khan min ti hrilhhai hle. Mahse ram tana khel kan nih avangin tlawm a thiang lo a, kan rilru put hmang dik vangin mikhual tana inkhelh harsatna hmunah point hlu tak kan hlawhchhuak," tiin a sawi.