ICC World Twenty20 Semifinal-ah West Indies leh England an lut

Twenty20 inelna lian ber ICC World Twenty20 chu a hmawr an bawk hnai ta. West Indies chuan Zirtawpni zan khan South Africa chu wicket thuma hnehin semifinal an lut a, Inrinni zana Sri Lanka hnehtu England-in an hnung an zui ve leh bawk.

Group 1 aṭanga West Indies leh England tlin hma hian New Zealand chuan Group 2 aṭangin semifinal hi an lut tawh bawk a, nizana India leh Australia inkhela chak zawk zawkin semifinal hmunkhat ruak awm hi an luah ve leh bawk ang - he chanchin buatsaih a nih lai hian an result kan hre hman lo.

Proteas ngamtu Windies

South Africa-in semifinal luh beiseina an la neih ve chu West Indies-in Zirtawpni zan khan an tihtawp sak a, Prorteas (South Africa sawina) hi wicket thumin an hneh.

Nagpur khawpuia inkhelah South Afrcia-in over 20 chhungin run 122 lek an siam a, mi pariat an hloh. Proteas tan Quinton de Kock-a'n run 47 siam mah se a ṭhianten an pui ṭha tawk lo a, pakhat khelh ṭhatin nghawng a nei thui lo.

West Indies tan an target hi awlsam taka um phak theih mai tur niin lang mah se an che hleithei bik lo a, over 19.4-ah an target hi umpha chauhin run 123 an siam a, mi pasarih an hloh.

Windies tan an thiampuipa Chris Gayle chuan run li chiah tlin mah se Johnson Charles chuan run 32 a siam bakah Mar-lon Samuels-a'n run 44 a siam ve bawk a, an team hnehna chan-puiin semifinal an lut ta a ni.

West Indies hian match thum inkhel an hmachhawn tawhah hnehna an la chang vek a, nimin tlai khan Afghanistan nen inhmachhawn lehin an result erawh kan hre hman lo.

Beisei bo Pakistan

Pakistan-in an match hmasa berah Bangladesh hneh mah se India leh New Zealand an hneh loh hnuah Australia chu run 21 in an hneh lo leh a, beisei tur nei tawh loin an puanthuah an tel.

Australia-in over 20 chhung-in run 193 an siam a, mi pali chiah an hloh. Australia tan run 61 siama a tawp thleng dam Ste-ven Smith a khel ṭha a, a tawp thlenga bat-a run 44 siamtu Shane Watson chuan a pui ṭha hle bawk.

Pakistan-in theih-tawp chhuah-in khel mah se over 20 chhung-in run 172 an tlin hram a, mi pariat an hloh. Shaheens tan run 46 siamtu Khalid Latif leh run 40 siama a tawp thleng dam Shoaib Malik-te khel ṭha viau mah se an target a tam hret a, an chak zo ta chuang lo.

Australian bowler zingah James Faulkner chu Pakistani batsman-te sawisatu a ni a, over li a vawmah run 27 chiah pein wicket nga a la thei a ni.

Balck Caps an vul

Tournament ṭan tir lama beisei kai lo ber pawl ni siin New Zealand an hmunawm zel a, semifinal an luh chian hnuah Inrinni tlai khan Bangladesh chu run 75-in an sawp.

New Zealand hian over 20 chhunga run 145 siamin mi pariat an hloh a, run 42 siamtu captain Kane Williamson chu Black Caps tana run siam hnem ber a ni.

Bangladesh bowler-te'n an vawm ṭha takzet a, over li a vawma run 22 chiah pea wicket nga latu Mustafizur Rahman-a'n a khel ṭha fal hle.

Mahse, an bowler-te'n an hna ṭha taka an thawh hnuah Bangladeshi batsman-te'n an hna an thawk ṭha tawk lo. Over 15.4-ah run 70 chiah tlinin an vaiin an out vek a, run siam hnem ber Shuvagata Hom meuh pawhin run 16 a tlin hram.

Black Caps bowler zingah wicket thum ve ve latu Grant Elliott leh Ish Sodi-te'n an khel ṭha hle. Grant Elliott hian over li a vawmah run 12 chiah pein wicket thum a la a, India chhulchhuak Ish Sodi-a'n over 3.4-a vawmah run 21 chiah pein wicket thum a la bawk.

England an kal zel

Delhi khawpuia inkhelah England chuan run 10-in Sri Lanka an hneh a, semifinal an lut ta. England hian over 20 chhungin run 171 an siam a, mi pali chiah an hloh.

England tan opener Jason Roy-a'n run 42 a siam hnuah Jos Buttler a inlar a, kum 25-a upa batsman hian run 66 siamin a tawp thleng a dam.

Sri Lanka-in over 20 chhungin run 161 an tlin hram a, mi pariat hlohin a tlawm zawkah an ṭang ta a ni. Sri Lankan batsman zingah run 73 siama a tawp thleng dam Angelo Mathews a khel ṭha fal nalh a, mahse team captain hi a naute'n an ṭawiawm ṭha tawk lo.

England bowler zingah Chris Jordan chuan over li vawm-in run 28 chiah a pe a, wicket li lain England semifinal kalkawngah a thawh hlawk hle.