I League champion hnehtu MPL champion Aizawl FC
Kum 1889-a din Mohun Bagan-in Mizoram an rawn tlawh hmain tun season I League match 11 an khelh tawhah chak loh an la nei lo a, AFC Cup match thum an khelh tawhah an la chak vek. Kolkata club hian Singapore club Tampines Rovers FC hnehin India ram club zinga AFC Champions League qualifier-a chak hmasa ber an ni bawk - Aizawl FC-in an lo hneh.
Inrinni khan RG Stadium, Mual-puiah vanglai hun hmang mek Mariners leh Aizawl FC an intum a, MPL champion-in Joel Sunday leh Lalchhawnkima-te goal hmangin Mohun Bagan an barakhaih a, India ram a deng chhuak nghal. Inkhel result hi Bengaluru FC leh East Bengal te champion beiseina chhem nungtu a ni. Champion beisei club pathum leh tla ve thei lo DSK Shivajians tih loh club panga Sporting Goa, Aizawl FC, Salgaocar, Mumbai FC leh Shillong Lajong te chu tla thei vek an ni.
Tun season hi I League ngaih-nawm ber ṭum a ni a, Mizo club Aizawl FC leh anmahni ṭantu Mizo mipuite chu a tikimtu satliah ni loin India ram league sang ber hlutna belhchhahtu an ni.
Thawhlehna chu
Khatia head coach Jahar Das leh manager K. Malsawmkima hoa an zinchhuah khan khel ṭha inti hle siin Bengaluru FC leh Mumbai FC lak aṭangin point khat chiah an rawn hawn. East Bengal hmachhawn zuiin club lamin an khelh ṭhatzia sawi kher ṭul loin inkhel entuten an khelh dan an hmu a, an vanduaia point erawh an hmu lo. Player pawimawh Lalramchhullova leh Emma Chigozie ten red card an hmuh avang leh Aizawl FC hmabak chu champion lai Mohun Bagan a nih avangin tualchhung football ngainatuten beisei a tlem tih an hria a, an hnual hle.
Inkhel en man ticket a tlahniam a, Aizawl FC hotu insawifiah dan leh mipui ngaihdan a inang lo a nih pawhin tlutlukna fuh tak a ni. Chutiang bawkin East Bengal nena substitution siam sual vangin manager Mala an chhuahchhal a nih chuan Leitan pachal hi Bagan hneh thei tura player-te a fuih phur avangin an fak ngei tur a ni.
India champion leh MPL champion chu Mualpuiah an inkhel ta a, ṭan aṭanga minute thumna lekah Brandon VL Remdika pass chu Joel Sunday-a'n a pet goal nghal.Nigerian striker Sunday hian 'Saturday'-ah goal hnih a khung ta!
Bagan an harh chhuak nghal a, Japanese midfielder Katsumi Yusa leh World Cupper Cornell Glen-te khelh danah inkhelh hmanga ei zawng an ni tih a chiang a, Trinidadian striker hian minute 24-naah I League-a vawi khat inlanna MPL best keeper Lalawmpuia leh defender Lalṭhakima-te inring thul karah goal a khung. Aizawl FC an chungnung hret a, first half tawp dawna Brandon leh Yuta Kinowaki te hlah chu goal-a chantir theih tur a ni.
Second half ṭan aṭanga minute 11-naah Albert Zohmingmawia dah ṭhatu Manipur defender Dhanachandra Singh chuan Lalruatthara ball pet chu a kuta a dan avangin Bagan-in penalty an chawi a, Chhawnkima'n Bagan keeper bum zuiin mipui thawm a ṭha hle. Mariners-in an si purh sut tumin striker Azharuddin Mallick leh midfielder Pankaj Moula-te luhtir mah se Aizawl FC tlarhnung an su nghing zo lo.
Mizo hero David
Aizawl FC captain David Lalrin-muana chu hero of the match-ah tun season-a a vawi lina atan thlan a ni a, ṭum dang zawng aiin Zem-a-bawk North tlangval hian lawmman dawn hi a phu.
David hian player ṭha tih tur leh captain tih tur a pe a, a theihna zawng zawngin a khel tih chu mipui thawm aṭangin a chiang.
Inelna buatsaihtuten pakhat chauh an thlan chhuah avangin David-a chauh hi khel ṭha a ni lo a, jersey sen nena khelmual chhunga inlante inpekna chu
ṭum dang zawng aiin a ṭha zawk.
Ball zawng zawng chan tumin theihtawp an chhuah a, ball an chan lohin defender an ni vek a, goal khat leka hma an hruai avangin an dinhmun derthawng deuh mah se East Bengal nena an khelh dan nen chuan a danglam ta.
Bagan keeper Debjit Majumder leh referee Priyobrata Singh vangin goal tam zawk an khung lo. Hun tawp dawnah Alfred Kemah Jaryan chu Bagan substitute Abishek Das-a'n chiang takin titlu mah se referee Priyobrata-a'n penalty a pe lo a, Bengali keeper hian Albert-a ball pet leh Sunday-a tauh goal ngei tura ngaih chu a dang bawk.
Majumder hi Turkmenistan hmachhawn tur India team-ah koh a ni a, a thiamzia hriat theih tur khawpa Aizawl FC ten Mariners keeper an fiah ngun hian inkhelh dan tawi fel takin a sawi fiah.
Engtin zel?
Mohun Bagan hian ram tana inlan vangin Haitian star Sony Norde, Iran laka India captain Jeje Lalpekhlua, midfielder Pronay Halder leh defender Pritam Kotal bakah inhliam vangin Balwant Singh te an chhawr thei lo. Head coach Sanjoy Sen hrem vanga khelmual chhunga Bagan kaihhruaitu Shankarlal Chakraborty chuan chhuanlam siam a tum lo.
Shankarlal chuan, "Kan khel ṭha lo a, a bik takin second half-ah kan khel ṭha lo lehzual. Aizawl FC-in chak an phu a, an khel ṭhat vanga chak lo kan ni. Kan kim loh vang ni loin kan khelh ṭhat loh vanga chak lo kan ni a, kan match khelh leh turah tho chhuah nghal kan tum a, champion kawng kan zawh leh tawh ang," tiin Aizawl FC-in chak an phu thu a sawi.
Bagan coach hrem tawk Sanjoy Sen pawhin stadium pawna amah kawmtu media-te hnenah, "Kan vanduai a ni lo a, kan khel chhia a, chak phu zawk Aizawl FC an chak," tiin MPL club a fak.
Aizawl FC head coach Jahar Das chuan, "Kan chakna hi Aizawl FC tan ringawt a ni lo a, Mizoram tan a ni. Kolkata aṭanga rawn kal press mi lo kalte'n Bagan laka hetiang anga khel ṭha hi kum tam tak chhung an hmuh loh thu min hrilh a, kan khelh dan a lungawithlak. Ka sawi tawh angin Aizawl FC hi kan relegate ka ring lo a, mah se Bagan hneh vanga tla lo tur kan ni lo, kan hmabak match aṭangin point kan hmuh a ngai," tiin an la him loh thu a sawi.
Bengali coach Jahar Das hian inkhelh hmain a club hlui Bagan lakah 'upset' an thlentir thu a sawi lawk a, inkhel banah a thusawi dikna a lang.
Aizawl FC hian Zirtawpni hian Shillong Lajong an tlawh ang a; Mohun Bagan-in Inrinni zan hian Mizoramin Santosh Trophy nomawi an chawina hmun Kanchenjunga Stadium-ah East Bengal nen Kolkata Derby an khel ang.
ENG VANGIN NGE AIZAWL FC 5-NAAH AN AWM?
I League Ranking System
A. Match zawng zawng aṭanga an point hmuh tam dan indawtin an position rem tur a ni.
B. Team hnih emaw a aia tam emaw point hmuh zat a inang a nih chuan
a) Point hmuh zat inangte intum kualna
aṭanga an point hmuh zat en tur a ni.
b) Point hmuh zat inang club-te goal difference (GD) chu en leh tur a ni.
c) GD-a an la intluk chuan point hmuh zat inang-te goal thun tam dan chu en leh tur a ni.
d) A la intluk fo chuan an match khelh zawng zawng aṭanga goal difference chu en tur a ni.
e) GD-a an la intluk chuan match khelh zawng zawng aṭanga goal khung tam zawk chu en leh tur a ni.
f) A la intluk fo chuan ṭhumvawr tur a ni ang.
Tun dihmunah
Aizawl FC, Salgaocar, Mumbai FC leh DSK Shivajians te chuan point 12 ṭheuh an hmu a, table-a an position chu team pali inkhelh kualna aṭanga siam rem tur a ni. Aizawl FC hian team pathum dang lakah hian chak loh an nei lo a, vawi li khelh tawhah point riat hmuin team pali zingah an sang ber.
Hei vang hian Aizawl FC pangana niin tun season-a an thlen san lai ber a ni. Chutihrualin ni thum liam ta khan MPL champion hi table mawngphaha awm an nih avangin an dinhmun erawh a la him lo hle.
Team pali bik inkhelh tawhna
Aizawl FC 2 - 0 DSK Shivajians
Aizawl FC 2 - 0 Mumbai FC
Salgaocar 1 - 1 Aizawl FC
Mumbai FC 2 - 2 Aizawl FC
DSK Shivajians 2 - 3 Salgaocar
DSK Shivajians 1 - 0 Mumbai FC
Salgaocar 2 - 2 Mumbai FC
Mumbai FC 2 - 1 Salgaocar
Inkhelh hmabak
Aizawl FC Vs Salgaocar
DSK Shivajians Vs Aizawl FC
Salgaocar Vs DSK Shivajians
Mumbai FC Vs DSK Shivajians
ZoFooty Statistics
Aizawl FC 2 -1 Mohun Bagan
AFC : Joel Sunday 3'; Lalchhawnkima 56' (P)
MB : Cornell Glen 24'
53% Ball Possession 47%
14(4) Shots (On Target) 7(2)
302(225) Pass (Complete) 291(194)
14 Fouls 18
0 Offside 2
12 Corner Kick 1
0 Yellow Card 1
0 Red Card 0