Match 750 chak thei Serena

Serena Williams chuan record thar siamin match 750 tehmeuh hnehna a chang ta. Nimin khan Zarina Diyas hnehin Miami Open third round a paltlang. Florida-a in-khelah Williams hian Diyas lakah hian minu-te 54 chhungin 7-5, 6-3 in hnehna a chang.

World number 1 Serena hian a career-ah match 750 hnehna chang tawhin vawi 125 chak loh a nei thung a, Lindsay Davenport (753) leh Martina Navratilova (1,442) te record a hnaih sawt hle. Ani aia hnehna chang tam player paruk chiah an awm tawh a ni.

Kum 34-a upa Serena chuan, "Diyas khan tawnhriat a la neih tam loh vangin inkhelh a harsa a ti deuh a ni maithei, theihna sang tak a neih avangin hma hun eng tak a nei niin ka hria. Hetiang hun ka thleng thei hi ka lawm a, player ropuite huanga ka hming ziah lan a ni ve zel hian mi ti hlim," tiin a sawi.

Williams hian fourth round-ah Svetlana Kuznetsova a hmachhawn leh ang, anni pahnih bakah hian Agnieszka Radwanska, Romanian Simona Halep, Swiss Timea Bacsinszky, Russian Ekaterina Makarova leh Heather Watsonnte pawhin third round an lo paltlang ve tawh bawk a ni.

WTA All-Time Match Win Leaders

Player Match chak zat

Martina Navratilova 1442

Chris Evert 1,309

Steffi Graf 902

Virginia Wade 839

Arantxa Sánchez-Vicario 759

Lindsay Davenport 753

Serena Williams 750