Europa League Inter Milan hmaah Shakhtar Donetsk

Antonio Conte kaihhruai Inter Milan chuan zanin dar 12:30 hian Europa League semifinal khel turin Shakhtar Donetsk an hmachhawn dawn. Nizan khan Manchester United leh Sevilla ten semifinal pakhat zawk an khel; August 22, Inrinni zanah final khelh tur a ni ang.

Player leh an sulhnu thlir chuan Inter Milan hi chak zawk tura rinkai an ni. Mahse Covid-19 vangin inelna kalphung tih danglam a ni a, Esprint Arena-ah entu awm loin an khel dawn, second leg a awm dawn loh avangin minute 90 inkhelh turah chuan Shakhtar hi an zam dawn bik lo.

Italian club lian leh Ukrainian champion hi tun hmain vawi khat chauh an la intawng, an intawn hmasak hi 2005-06 season Champions League group stage kha niin Inter lamin aggregate-ah 3-1 in hnehna an chang.

Antonio Conte-a'n Inter Milan a zawm khan Italian football fans tam tak an phur hle. Hun rei tak chhung Juventus rorelna chu na taka chuh buaitu an awm phak dawn niin an ngai, hripui leng leh harsatna hrang hrang karah Turin club erawh an champion ta tho.

Italian manager hian club neitu lam aṭangin thlawpna a dawng ṭha tawk loah a inngai a, season tawp lamah a phunchiar. Serie A tawp lamah khan Conte hian, "A huhoa thil sawi khawm a awm lo, president Steven Zhang lah China-ah a awm daih si," tiin a lo sawi tawh.

Club neitu lamin Conte hi chelh an duh a nih chuan a duh ang an tih hlawhtlinsak a ngaih hmel. A neihsa bakah player tawnhriat nei lak belh a duh. Italian media lamin an tarlan dan chuan Inter hian Conte duh ang tihsak an duh, mahse chumi ti tur chuan Europa League champion nih a ngai niin an sawi.

Manager rorum tak hian a duh a hlawhtlin theih nan chuan nomawi a chawi a ngai tihna a ni a, chumi tura a hna pawimawh hmasa ber chu Shakhtar Donetsk hneh a ni dawn, nidang ang bawkin khelmual chhungah thapui an thawh leh ngei ang.

Manchester United hnawl hnu, 'a thiam lo' tia an sawisel Romelu Lukaku kha Conte hnuaiah a vul mek a, amah hnawltu United laka phuba lak a chak zia la sawi lang kher lo mah se a chak dawn tih chu thil chiang a ni. Chumi hma erawh chuan hnathawh tur a la nei, Ukrainian club laka goal khung a ngai.

United tan match 96 a khelh aṭangin Lukaku-a'n goal 42 a khung a, mahse a 'first touch' ṭha lo leh 'final third' vela a chet danin club a ti lungawi zo lo, pound maktaduai 74 in an hralh. Inter tan erawh match 59 aṭangin goal 31 a khung leh der tawh - innghahna tlak a nihzia a chiang.

Belgium international hian a thiamna bakah tharum hmangin khingpuite a nawr ṭhin a, zanina an hmachhawn tur Shakhtar tan pawha ven ngai bik tur a ni. Amah thlawp turin season duhawm hmangtu Lautaro Martinez a la awm bawk.

Inter hian United aṭanga an lakluh Alexis Sanchez an kawl bawk. Mahse Chile international hi Bayer Leverkusen an hneh ṭumin a inhliam a, zaninah a inlan theih a rinawm lo. Tottenham midfielder hlui Christian Eriksen a dam ṭha mah se Danish midfielder hian inkhel bul a ṭan meuh lo.