Zaninah India Vs Turkmenistan
India tan 2018 FIFA World Cup khelh a beiseiawm tawh lo a, zanin dar 6:00 hian Kochi-ah qualifier match hnuhnung ber Turkmenistan nen an khel ang. Jeje Lalpekhlua telna India team inkhel hi Sony Six-ah a en theih dawn a, FIFA World Cup ang zawngin hlutna nei tawh lo mah se 2019 AFC Asian Cup khel tur zawnna a nih tel avangin pawimawhna a la nei thung.
Table mawngphah
India hi Group D-ah Iran, Oman, Turk-menistan leh Guam nen an awm ho a, nikum November thla khan Bengaluru-ah Guam an hneh a, a bak chak an la nei lo.
Point thum chiah an la hmuh avangin India-in an chungchiaha awm Guam (7 points) an umpha thei lo. Amaherawhchu 2019 Asian Cup khel tur zawnna neih chhoh zel turah India hi group dang pangana dinhmun hauh mekte nen khaikhin an ni dawn a, an dinhmun ṭhat dan a zirin Asian Cup kalkawng a awlsam thei ang.
India hian an match hnuhnung berah Iran an hmachhawn a, Tehran-a inkhelah hian Mizo tlangval Jeje chuan senior team tan captain armband a hreng a, Mizo zinga India national team tana captain hmasa ber a ni.
Amaherawhchu Jeje captain-na hnuaiah India-in result ṭha an hlawh chhuak lo a, khualmualah 4-0 in an tlawm.
Chhetri a kir
India team hian Inrinni zing khan Kochi an thleng a, player ṭhenkhatin zin chauh nei deuh mah se Bengaluru captain Sunil Chhetri kir turin boruak a tih danglam beisei a ni.
India captain Chhetri chuan, "Tuna kan point hmuh aia tam hi qualifier-ah kan beisei a, mahse kan phu tawk point kan hlawh chhuak lo. Amaherawhchu, kan team-ah player naupang an tam a, hma kan sawn chhoh zel hi a ṭul a ni," tiin a sawi.
Ṭhal hliam vanga Iran hmachhawn thei lo Chettri rual hian East Bengal midfielder Mohammed Rafique leh Mohun Bagan keeper Debjit Majumder ten India team hi an zawm bawk.
Inkhel tur chu
Turkmenistan hi FIFA ranking-ah 113-naah an awm mek a, India erawh 160-naah an awm thung. An intawn hmasak ṭumin Turkmenistan hi 2-1 in an chak a, India goal awmchhun khungtu hi Jeje Lalpekhlua a ni.
India coach Stephen Constantine chuan, "SAFF Cup-a kan champion ṭum khan mipui aṭangin ṭawiawmna kan hmu ṭha em em a, Kerala mipui 45,000 zet khan min au phur lo se chuan kan champion kher lo ang. Chuvangin India national team tan chuan Kerala hi a pawimawh a ni," tiin ṭantu an neih ṭhat a beisei thu a sawi.
An khingpui tur chungchang sawiin Constantine chuan, "Turkmenistan hian March 24 khan match an nei ve lo a, chuvangin harh vang ṭha takin min hmachhawn thei ang. Anni hian Group D-ah point 10 an hmu tawh a, team ṭha an ni," tiin an ṭhat thu a sawi.
Jeje-a thukhawchang
Iran nen an inkhelh ṭuma India captain Jeje chuan, "India tan hian U19 leh U22-ah te ka lo captain tawh a, mahse senior team tana captain chu a dan a dang deuh. Engkimah mawhphurna a sang a, ground chhung leh pawnah team kaihhruaitu nih a ngai. Mahse captain mawhphruhna khan chona nasa tak min pek a ni," tiin captain chungchang a sawi.
Turkmenistan nena an inkhelh huna captain tur hi coach Constantine-a'n official-in a la puang lo. Sunil Chhetri-a'n starting eleven a chang a nih chuan a captain armband a hren chhun-zawm a rinawm a, chutihrualin Jeje-a'n a vawi hnih nan India captain hna a chelh thei bawk.
Hnahthial tlangval Jeje chuan, "Iran chu kan la thlau deuh a, kan hneh lo a ni. Turk-menistan nena kan inkhel tur hi a pawimawh a, theihtawp kan chhuah ang," tiin Vanglaini palai a hrilh.
India team-ah hian Jeje Lalpekhlua bakah Bengaluru FC wing back Lalchhuanmawia a awm bawk.