MWA-in Jeremy-a lawmpui

Mizoram Weightlifting Association (MWA) chuan Zirtawpni khan Jeremy Lalrinnnunga lawmpuina hun an hmang a, pasalṭha chawimawina diar bakah Rs 15,000 an hlan a ni.

Lawmpuina hi Mizoram Weightlifting Acedemy, Ramhlun Sports Complex-ah neih niin, MWA president H. Thangchungnunga chuan Mizo ritchawi chak zingah Olympic khel tur an awm ngei dawn nia a hriat thu a sawi a, a lakah beiseina an neih san thu a sawi bawk.

India tana Youth Olympic gold medal la hmasa ber Jeremy chuan, "Senior huanga Olympic khelh hi ka duhthusam a ni a, chumi tur chuan theihtawp ka chhuah zel. Tokyo Olympic kuminah neih theih a ni dawn lo a, nakkuma an sawn hi ka tan chuan malsawmna a nih ka beisei.

"Inelna an sawn vang hian training hun ka ngah phah dawn a, hliam nei loa ka inbuatsaih thei a nih chuan Japan khawpui Tokyo-ah kal theih ngei ka beisei," tiin a sawi a, inelna lian hmachhawn theih ngei a inring.

Tokyo Olympic qualifier an khelh tawh chinah Jeremy hi a che ṭha thawkhat a, tun dinhmunah chuan inlan thei ngei tura ngaih a ni. Covid-19 vangin inelna tam tak an hmachhawn thei lo a, kalphung ti danglama an thlak thut a nih lem loh chuan Japan-ah Mizo tlangval kan hmuh ngei a rinawm.