Cricket World Cup-ah Australia an champion: A sa sehah India an duap leh ta
Cricket World Cup-ah inelna thlengtu India-in final hma zawngin an khingpui an hneh vek a ni ringawt lo a, an sawp! Mahse, vawi 10 zet hnehna a zawna an channa chu a uiawmna belhchahtu chauh a ni a, Pathianni zan khan Rohit Sharma hoten rilru huaisen zawk Australia nomawi chawi lai an thlir.
Entu 132,000 lenna Narendra Modi Stadium, Ahmedabad-ah mipui an khat vek a, Australia ṭantu kawr eng ha tlemte chu India ṭantu kawr pawl haten an hliah khung hneh hle. Rohit Sharma hoin India-in bul ṭan ṭha mah se an lawm hun chhung a rei lo a, over 50-ah 240 runs chauh siamin an thi vek. Australia bat hun a thleng a, Men in Blue-in dinhmun ṭhat zawk lai nei mah se a tawp meuh chuan Aussies-in over 43 lekah 241/4 runs siamin hnehna an chang.
Australia hian a vawi ruk nan World Cup nomawi an chawi a, captain Pat Cummins duhthusam a thleng a, Narendra Modi Stadium-a entu mipui nuai khat chuang an ngawi. Final-ah Aussies opener Travis Head-a'n century (137 runs) a siam a, man of the match-a thlan a ni. Australia hian ODI World Cup leh T20 World Cup nomawi an kawl kawp a, hei hian an ropuina a nemnghet.
Ṭhumvawr
India hi World Cup-ah vawi hnih an champion tawh a, kum 1983 leh 2011-a nomawi an chawi ṭumah ṭhumvawrah an chak lo ve ve. Kumin final-ah pawh Men in Blue hi ṭhumvawrah a vanduai zawkah an ṭang a, Australia captain Cummins-a'n vawm hmasak a thlang.
Thil kal tawh thlirlet chuan India dinhmun a ṭhaah a ngaih theih a, mahse kumin World Cup-a thil thlen tawh dan thlir chuan Cummins-a thutlukna a dik. Group stage-a WC match li khelhah vawm hmasa zawk vawi thum an chak tlat.
Final boruak chu
India mipui nomawi duhin an tuihal a, final meuh chu a boruak a dang tawh. Kum 24 mi Shubman Gill-a'n zirlai thar a chhar a, run li chauh siamin pavilion-ah a kir. Captain Rohit Sharma-a'n ṭum dang ang thoin ṭha takin bul a ṭan a, ball 30-ah 47 runs a siam hman. Mahse, kum 36 mi Rohit meuh pawh a famkim bik lo a, a duhthawh hret avangin ball 31-naah Head-a'n dive chungin a man sak - a hnua century a siam ai mahin a pawimawh zawk thei hial ang.
Shreyas Iyer-a chet ṭhat ṭhin nen final-ah erawh run li bak a siam lo a, India batter-te ṭha viau mah se a sa seh hunah kum 30 ral kai vek tawh Aussies bowler Mitchell Starc, Pat Cummins leh Josh Hazlewood te an ngam lo.
Virat Kohli-a'n half century siam bawk mah se 54 runs chauh a siam - mamawh chhanna a ni pha lo. Ravindra Jadeja pawhin run kua chauh a siam. KL Rahul tan risk lak ngam chi a ni tawh lo a, ball 107 hmachhawn mah se team dinhmunin a zir tawh loh avangin 66 runs bak a siam lo.
T20-a batter ṭha bik Suryakumar Yadav-a'n hun tawp lamah hlap viau a tum a, a hlawhchham - 18 runs siam turin ball 28 a mamawh. Aussies bowler hmaa India batting line up chhuanvawr an tluk sawp tawh avangin tailender chungah beiseina a sang lo a, a tawp thleng an ding tluan thei kha a ṭha lamah a ngaih theih. Chutihrualin Narendra Modi Stadium-a 240 runs lek chu a tlem hret.
Beiseina beidawng
Australia opener David Warner-a'n India bowler chhuanvawr Jasprit Bumrah 4 runs a vuak sak nghal a, over khatnaah Men in Blue beiseina a bo titih. Mahse, tun World Cup-a wicket la hnem ber Mohammed Shami-a'n Warner chu Pavilion-ah kir tir a, Bumrah-a'n Mitchell Marsh (15 runs) leh Steve Smith (4 runs) te an insiamrem hmain a vawm hlum bawk.
Over sarihnaah Aussies-in 47 runs an siam a, wicket thum an hloh avangin India dinhmun a ṭha leh zawk hretah a ngaih theih. Mahse, Rohit-a'n specialist bowler panga chauh a thlang. Vawm vir thiam pahnih Ravindra Jadeja leh Kuldeep Yadav te vanneih ṭum a ni lo - wicket an la thei tlat lo.
Head (137 runs) leh Marnus Labuschagne (58 runs) te an inkawp ṭha a, an pahnih inkawp hian 192 runs an siam avangin India beiseina an titawp. Century siamtu Head chhuah hnuah Glenn Maxwell a rawn lut a, Afghanistan laka double century hian Aussies champion-na run a rawn vaw chhuak.
India an duap
India-in talent an nei ṭha tih chu match hmasa 10-ah chiang takin a lang a, final hma zawng hi chuan batting, bowling leh fielding-ah an ṭha em em vek. Australia ngei pawhin wicket rukin an hneh a, ball 52 an dah bang.
Final-ah erawh India batter-te aiin Aussies bowler-te theihna a langsar zawk a, Cummins leh a hote fielding phei chu ṭha tak a ni. Aussies player-te hian boundary tur ṭhahnem tak an dang a, India batter-te an tihsualah an hrem chat chat bawk.
India erawh hun pawimawhah an fielding a ṭha tawk lo a, wicketkeeper KL Rahul a tih ṭhat tawk loh vangin an khingpuite runs an pe hnem a, Aussies batter-ten pressure an neih tlem phah bawk. A tawpah erawh final boruak tem ṭhang Aussies bawk an chungnung a, India tan erawh a nomawi hnai hman viau mah se inelna a zawh meuh chuan a hla leh ta hle.
