London aṭangin Arsenal ṭantute pawmpui

Mizoram Arsenal Supporters' Club (MASC) chuan tun hnai khan Arsenal hmunpui London aṭangin 'Official Fan Club' an nih pawmpuina an dawng a, Inrinni khan he pawmpuina an dawn tlangzarh leh Pathian hnena hlanna hun an hmang.

Mizo Gunners ṭantute hian hun rei tak chhung chu hmunpui aṭanga pawmpui tur hian hma an lo la tawh a, an duh anga a hlawhtling thei ta hi an lawm hle. Mizoram aṭang hian Manchester United, Liverpool leh Chelsea te chuan hmunpui aṭanga pawmpuina an lo dawng tawh bawk.

Gunners hian an manager thar Mikel Arteta kaihhruaina hnuaiah FA Cup an chawi a, season tharah Europa League an khel ang. Inkhel ngainatute hian football an en bakah an phak ang tawkin vantlang tan thil ṭha an ti ve ṭhin, an hma lakna ṭhenkhat zingah chuan thisen pek leh mi harsa ṭanpui te chu a langsar zual an ni.