Zaninah I League inkhel en tur a awm dawn
Aizawl FC-in RG Stadium grass thara I League match an khelh hmasak berah 5-1 in Delhi FC an hneh lo. Mizo club hian hnehna chang turin ṭantu an mamawh a, mahse ticket manah Rs 200 an chhiar a, player au phur tham mipui an pung khawm lo. An vanduaina belhchhah turin ruah a sur nasa a, lei hrula ball inpek a harsat avangin an duh angin an khel thei lo a, Mizo club harsatna tawh hi pumraw lian zawk Delhi FC lawmna a ni.
Zanin dar 7:00 hian Aizawl FC-in RG Stadium-ah I League match an khel leh dawn a, chak ngei an mamawh avangin Mizo mipui puihna an mamawh hle. Aizawl FC thuneitute an dinna ngaiah an la ding a, en man Rs 200 a la ni. Chutihrualin school naupang tan ID Card hmangin a thlawnin a en theih a, khua a ṭhat tawh bawk avangin entu an tam hret ang. I League-a Mizo club an chet ṭhat theih nan tualchhung football hmangaihtute thawhchhuah a hun e.
Insiamṭhat mamawh
Aizawl FC-in Delhi FC laka goal nga an chhuah zawhah MPL-ah Chawnpui FC an hmachhawn a, goal an chhuah lo. Coach B. Malsawmzuala hote hi an insiamṭha nghal tihna a ni lo a, an tlarhnung hi a la phui lo. Delhi FC angin Chawnpui FC-in an tihsual an hrem lo tihna a ni zawk. Foreigner pahnih Ivan Maric leh Gustavo ten bul an ṭan tura ngaih a ni.
Mizo club-in inkhel an thunun theih nan midfield-ah insiamṭhat an mamawh a, state pawn player Sheikh Sahil-a'n beisei a phak lo. Hemi a nih avang hian Mizo midfielder-ten mawhphurhna an lak theih a ṭul dawn a; K Lalrinfela, Lalramsanga, Lalthankhuma leh KC Larchhuakmawia te zinga khelhna hmun changin mamawh chhanna nih an tum ang.
Midfield leh tlarhma lamah Mizo club-in foreigner an la nei lo a, Mizo player-te bawk an pawimawh dawn. R. Lalthanmawia'n goal mawi bik a khung avangin a khelh leh mai a rinawm a; R Ramdinthara, Lalbiakdika leh Augustine Lalrochana te aṭangin mual sir lehlama awm tur thlan a ni ang.
Delhi FC lakah Neroca laka hattrick siamtu Lalrinzuala a che ṭha tawk lo a, Serchhip tlangval hi ṭha taka khel tur chuan ball chan tam a mamawh a, midfield leh forward an zawm ṭhat lehzual a ṭul dawn a ni. Aizawl FC hi pariatnaah awm rih mah se an chak a nih chuan palinaah an invawrh chho thei ang.
Namdhari club chu
AFC khingpui tur Namdhari hi club thar an ni a, vawi li an khelh tawhah Real Kashmir (1-0) chiah an la hneh a, Churchill Brothers (0-0) nen inhnehtawkin Inter Kashi (4-2) leh Neroca (2-1) te an hneh lo. Mahse, an inkhelh tawhna aṭanga teh a fuh lo tih chu Delhi FC aṭangin Mizo club-in an hre tawh ang.
Namdhari hian Aizawl FC pawhin lak tuma an lo melh tawh Spanish midfielder Imanol Arana bakah Ghana defender Stephen Acquah te an kawl a, Punjab club an nih avangin khawtual player ṭha an nei nual bawk. An match hnuhnung bera an hneh loh Neroca hi injury time-a goal an chhuah avanga chak lo an ni a, an inthlau lo.
Punjab club coach Francesc Bonet chuan, "Kan duh dan chu ni se foreinger nghah kan duh a, mah se club thuneituten tualchhung player chhawr tam an duh. Hei vang hian foreigner pahnih chauh kan nei a, kan thil tum erawh a ngai reng. Kan inkhelh apiangin point thum hmuh kan tum," tiin Rajasthan United leh Gokulam Kerala enkawl tawhtu hian Vanglaini a hrilh a, champion tum an ni lo tih a hriat theih. Mizo club tan tun hi point thum hmuhna remchang a ni a, RG Stadium-a Namdhari an hneh thei lo a nih chuan champion beisei ngam chi a ni lo ang.