Ṭhazuala a vanduai

Yonex Sunrise 30th Smt. Krishna Khaitan Memorial All India Junior Ranking Prize Money Badminton Tournament (Under-19) ah Mizo rawlthar H. Lalṭhazuala'n boys singles-ah final thleng mah se, a keah hliam a neih avangin final a khel tluan thei lo a, pahnihnaah lungawi a zir.

Panchkula, Chandigarh-a neih inelnaah hian India ram hmun hrang hrang aṭangin players 1150 chuang zetin entry an ti a, Ṭhazuala hian ngaihhlut hlawh ber leh entry 490 lai awmna boy's singles category-ah final lutin, Mizo zinga national level ranking tournament U19 huang bika final lut hmasa ber a ni.

November 14 aṭanga neih ṭan inelnaah Ṭhazuala hian final-ah Tamil Nadu shuttler Pranauv Ram Nagalinga a hmachhawn a, nomawi hlawhchhuah tum viau mah se 21-15, 11-2 (retired) in a hneh ta lo - Chanmari West rawlthar Ṭhazuala hian semifinal-ah seeded 8-na Sanskar Saraswat chu deciding-ah 21-16, 11-21, 21-17 in a hneh a, he inkhelah hian hliam tuarin, ke ulh chungin a khel a, chakna a chang hram.

Hliam nei chungin final hmachhawn leh mah se Ṭhazuala tan a harsa hret tawh a, a tlawm zawkah a ṭang ta a ni - kum 16 mi Ṭhazuala hi Tata Trusts (NEIDA) sponsor-na hnuaia Pullela Gopichand Badminton Academy (PGBA), Hyderabad-a inzir mek a ni a, Under-17 category ah pawh la khel thei ni chungin U19-ah final a lut thei hi a ropui hle.

Mizoram Badminton Association (MBA) chuan thuchhuah siamin, "Mizo ten India ram badminton khawvela kan la thlen phak ngai loh ram min hruai thleng a, min tihmingṭhatu Ṭhazuala hi kan chhuang takzet," an ti a, a hmalam hun atan duhsakna an hlan bawk.