A thiam ho zinga thiam ber Djokovic

Novak Djokovic hi chu tennis khel tura duan bik a ni chiang e! Serbian star hi a kum a tam deuh hnuah pawh rawlthar chhuak thar tan ngam chi a la ni lo - a vawi sarih nan ATP Finals nomawi a chawi leh ta.

Pathianni zan khan Italy rama Turin khawpuiah ATP Finals hmawr bawkna hi neih niin, world number 1 Djokovic hian Jannik Sinner chu 6-3, 6-3 a hnehin hlawhtlinna a chang a ni.

A thiam zual pariatte inelna ATP Finals-ah hian Djokovic leh Roger Federer ten record inṭawm an nei ṭhin, an record chu vawi ruk champion thei a ni. Tunah chuan Roger lak aṭangin Novak a kal fal leh ta.

Doubles lamah champion lai Joe Salisbury leh Rajeev Ram te chuan Marcel Granollers leh Horacio Zeballos te ṭangdun hnehin, nomawi an kawl lai chu an humhim bawk a ni.

Harsa lo

Group match an khelh lai khan Djokovic hi vawi khat a chak lo, final-a a khingpui Sinner erawh chak vek a ni thung. Kum 36 mi Djokovic hi a champion thei ang em, tih chu zawhna lian tak a tling.

Mahse, final boruak sangah chuan tawnhriat nei ṭha zawk Djokovic hi a tir aṭanga a tawp thlengin a chungnung, set hnih lak nan hian darkar khat leh minute 43 bak hun a mamawh lo hial a ni.

Set khatnaah a tir lamah a khingpui service a chhuhsak nghal a, ama service bikah point hnih chauh hloh chungin set a la fel der a, a tan harsatna lian tham sawi tur a awm lo.

Djokovic bawk set hnihnaah pawh a chungnung, service chhuhsak chunga bul ṭanin a che fuh leh phawt. Game rukna an khelh laiin Sinner hian a service chhuhsak theihna remchang nei mah se chhawr ṭangkai loin a thamral.

Season duhawm

ATP Finals champion a nih hnuah Djokovic chuan a tan kum duhawm bik a nih thu a sawi, harsatna hrang hrang paltlanga a thawhchhuah leh dan chhut chuan a tana kum ṭha bik tih hi a mak hran lo.

Covid-19 laka invenna vaccine a lak duh loh avangin Australian Open leh US Open hial a khel thei lo a nih kha, chumi hnuah rawn kir lehin kuminah heng inelna lian pahnihah hian a champion - French Open title a la bawk.

Grand Slam vawi 24 champion tawh Djokovic chuan, "Tennis zinkawng ka zawh tawha season duhawm ber pakhat chu a ni. Tualchhung tlangval Jannik a khel ṭha em em a, chumi hneh chu thil lawmawm tak a ni," tiin a sawi.

Serbian star hian world number 1 ni chungin kum tawp a hmang dawn tih a chiang tawh bawk. Nomawi hlu bik chawi hnem leh world ranking lamah chuan midang chungah a leng.

Nghah rih a ngai

Tun hmain Italian player zingah ATP Finals khel an awm ve tawh a, mahse semifinal thleng phak an la awm ngai lo. Sinner hian anmahni ramah record thar a siam, semifinal mai bakah final hial pawh a thleng.

Group match an khelh laiin a chak vek a, a hneh zingah Djokovic ngei pawh hi a tel. Mahse, nomawi inchuhna inkhelah meuh chuan seeded palina hi a ṭang zo lo a, uiawm takin a zinkawng a tawp.

Kum 22 mi Sinner chuan, "Djokovic khan a khel ṭha em em a, a bik takin court hnung lam aṭanga a rawn chet dan kha hmachhawn a harsa hle. Chubakah chuan ka khel ṭha tawk lo ve bawk.

"Khawvela player ṭha ber hmachhawn chuan tihsual neih zeuh a pawi a, ka tuar ta reng bawk a ni. Thil tam tak ka zirchhuak a, chak lo mah ila Novak hian player ṭha zawkah min siam," a ti.