Silly Point : KHAWVEL LAWM NAN AUSTRALIA

Indona hmuna chak lo zawk sipai tlawm leh hliam tuarte hi, chak hlutzia leh awmzia hrilhfiah thiam ber an ni - Emily Dickenson

Tuma chelh din rual loha saipui kal lai India Team chu, hetiang ang stage sanga a ngaihna hre riau, hmakhawsang aṭanga an lo inthlahchhawn emaw tih mai tur pasalṭha thlah kal zel Australia chuan an lo sai thlu ta!

Tournament tir lama nawi ve tak kha an insiamṭha zel a, a hun pawimawh taka team khelh ṭhat theih dan ber tura vawrtawp thleng Australia chuan tun tournament chhunga 5th gear a tlan, mahse lap hnuhnung bera petrol tlan kang ta si India chu tlawmin, a ṭum 6-na atan World Champion nomawi an hawn leh dawn ta.

Ṭhumvawr

Ṭhumvawr a vannei zawk Pat Cummings an home work ṭha taka rawn zira, a rawn inpuahchah tha tih a hriat a. Thlengtu Branch India team te vaw hmasa turin a tir lut.

Narendra Modi Stadium, Ahmedabad pitch kha over 2, 3 leh Australia-in an vawm aṭang khan run 300 chuang, 6 leh 4 thlawh chhuahna final a ni dawn lo tih a hriat nghal. Pitch a zawi a, ball a sawt muang a, batsman ten dawhtheihna leh runs lak theihna kua awm zawng zawng an dap a ngai dawn.

Mangchhia

Kaptan Rohit Sharma-an a tih ṭhin ang bawkin bul a ṭan ṭha. Ball thar lai leh powerplay 1 hman ṭangkai a ngai tih a hra, mahse a tum luatah amah a invaw hlum kan ti lo thei lo.

Virat Kohli leh KL Rahul ten theihtawp chhuah mahse, semifinal thlenga vice captain Hardik Pandya tel loh hriat loh khawpa khel ṭha India team chu, tailender an neih thui rah final-ah chuan a rawn lang ta a. No 8 aṭangin bat hum ngai lem lo an rawn lut dawn tih hre kur Virat Kohli leh KL Rahul te tan thlamuang taka ball han vuak vel a har tawh a ni. Run 240 an sual chhuak thei erawh a chhe lutuk lem lo a, mahse run 30 vel chuan target tha an short tih a chiang.

Head-Master

Khawvel hi chu a mak tiraw. Nimina tal te kha vawinah an hlim ni a lo inherchhuak a, nimin lama hlim te kha, vawinah chuan luaithli an nul hun a lo inher chhuak ve thung a. Thla 2 liamta a, a kut ruh tih tliah avanga chawl,World Cup league stage tir lam chanve pawh a la dam that loh avanga inlan thei lo Travis Head a mawlh hi. Rohit Sharma out-na tur atana a catch ropui lutuk mai chuan Australia team a tiphur a, Travis Head a final bul intanna tur hlimthla leh chu ni in.

Palian Muthlu thangharh

Tournament tir an inkhel hmasa pahnihah India leh South Africa lakah an mualpho. An khelh dan leh player ho che ziaah dem an hlawh. Australia an ang lo tih an ni hial. Chu chu insiamṭha in, captain Pat Cummings an hma an hruai, ani telin an ṭhangharh a, an sang telh telh.

Final chawhnua India bat laia Australia fielding teamwork ropui lutuk khan run 20, 30 vel chu an humhim ngei ang. Khatiang ang pitch muangah chuan ball vawm kawh tum aiin, a zawi thei ang bera vawm a ṭhatzia an hria a, Australia bowling line up field setting leh ball vawm dan kha Mark 100 ah za an pek theih.

Beiseina tibotu dai

Run 240 humhim turin, India-in an bowler-te an ring tawk. Rinngam an ngei in bul an ṭan ṭha. Amaherawhchu, zan dar 7:30 chho a ni a, Ahmedabad khawpuia thlasik dai a tla ta tlat mai. Team chhanhim hna khirh zet a thawh zawh hnuah, ka in show hun a thleng e ti niawm takin Travis Head a rawn penchhuak. Dai rawn tla tawh, India bowlers tan duhthala ball vawm a har tawh nen, khata tang kha chuan "one way traffic" a ni ta ber mai awm e.

Ropuina ramah Aussie

A zana khel tha zawk Australia team chak an phu a, champion team nih phu khawpa tun World Cup a khel India team erawh an hri vei laklawh, ICC tournament-a a vawrtawpa tawlhthluk an chinna hi an la vei chunzawm zel hrih a nih hi maw!

Bye bye World Cup

Halpuah, halmawi ri a zo a, nomawi nena thlalak leh nupui fanau tawiawmtute nen hlim taka hun an hman hnuah, Ahmedabad khelmual kil khata thla hmasa lawka World Cup a khelh theih leh theih loh tur pawh chiang lo, kut ruh tliak leh World Cup team a a tira an telh loh, midang inhliam avanga last minute a koh chawp, final-a Australia team ropuina rama hruaithlengtu Travis Head leh Marnus Labuschsgne te ṭhian dun titi hmelah chuan, champion lawmna avanga hlim hmel piah lakah, khuanu in an tan he hun hi a lo ruat ve hrim hrim dan hriat chhuahna hmel a lang tiin i khar mai ang aw.

Australia : Congratulations