Chanmari hmaa ding tur Project Veng

Zote Toyota MPL10-ah Chanmari FC-in vawiin chawhma dar 11:00 hian 1st Bn MAP Ground-ah Project Veng FC an hmachhawn dawn. League hmahruai mektu Chanmari hian point thum an hlawh chhuak thei a nih chuan hahdam takin semifinal an lut thei ang.

K. Malsawmkima kaihhruai Chanmari hian Project Veng hi an hmachhawn hmasak zawk ṭumin 1-0 in an hneh a, goal awmchhun hi Vincent Lalduhawma'n corner kick aṭanga a tauh luh a ni. An intawn hmasak ṭuma langsar zawk chu Zothanmawia a ni a, CFC-in Gokulam Kerala aṭangin College Veng keeper hi an la kir a, T. Mawia'n goal a chhuah lo.

T. Mawia hi Chanmari tlarhnungah goal vengtu ni ringawt loin ball semtu a ni tel a, Mizoram tan pawha captain Lalrinchhana Tochhawng inlan hnuah phei chuan Chanmari tlarhnung a phui lehzual hle. Vawiina Chanmariin Project Veng an hmachhawn leh hunah hian 'cleansheet' an tum leh dawn.

Chutihrualin Santosh Trophy group stage-a top scorer Lalkhawpuimawia (Mapuia) chu mipui mit fukna tur a ni a, Police-in Mapuia hi an chelh thei a, Kolasib club pawhin an veng uluk ang. Chanmari midfielder Crespo Vanlalhriatpuia chu inhliam vangin a inlan theih a rinawm lo a, Lalthangliana (AB-a) chungah mawhphurhna lian zawk a awm dawn. Mapuia thlawptu winger Laltlanzova'n match hmasa bera goal hnih a khung hnuah goal a khung leh tawh lo a, Zozoa hian inrintawkna nei let turin goal a mamawh viau bawk.

Project Vengin an muala Venghnuai an hneh hnuah 1st Bn MAP Ground-ah vawi hnih an chak lo a, relegation zone chhuahsan turin point an mamawh. Kolasib club-in point an hlawhchhuah theih nan tlarhnung tih phui a ṭul dawn a, goal an chhuah a nih phei chuan tlarhma lama awm Lalfamkima (FK-a), MS Dawngzuala leh Mangtinsei Robert Touthang ten goal an khung ve a ṭul dawn a ni.