India chuan zanin dar 7:00 hian World Cup 2026 qualifier khel turin Qatar an mikhual dawn a, Blue Tigers forward Lallianzuala Chhangte chuan hnehna chan tuma theihtawp an chhuah tur thu Vanglaini a hrilh. 
Lianzuala chuan, "Kan inbuatsaihna pawh a ṭha a, chak ngei tumin theihtawp kan chhuah dawn. Tun dinhmunah chuan Asia khawmualpuia team ṭha ber pawl an ni a, an laka point khat hmuh pawh a awlsam dawn lo. 
"Mahse, mahni muala khel tur kan ni a, Pathian zarah qualifier bul kan ṭan ṭha bawk a, kha ringawt pawh khan inrintawkna nasa tak min pek belh ang tih ka ring. Result ṭha thei ang ber nei turin kan bei ang," a ti a, Qatar laka chak an tum thu Vanglaini a hrilh. 
India hian an match hmasa zawkah Kuwait lenchilhin, khualmualah 1-0 in hnehna an chang. Inkhela goal awmchhun hi Manvir Singh-a khung niin, Lianzuala siamsak a ni a, Blue Tigers-in inrintawkna an neih vanglai tak a ni. 
Hetihrual hian Qatar hi 8-1 ngawta Afghanistan sawp hlim an ni a, he team hian theihna an nei. Mahse, Qatar hian kuminah match 14 khel tawhin, vawi li chiah chak an la nei a, Afghanistan an hmachhawn hma hian Iran chuan 4-0 in an sawp. 
Hriat tel atana ṭha erawh kumina Qatar-in an hneh zingah Jamaica (2-1) leh Mexico (1-0) an tel a, India lakah point thum mitthla chungin an lo zin ang. 
Portuguese coach lar Carlos Queiroz enkawl Qatar tan tlarhmaah Almoez Ali chu innghahna a ni a, kum 27 mi striker hian ram tan match 94 a khelhah goal 46 ngawt a khung tawh a, a nep lo hle - Sandesh Jhingan leh a ṭhianten a dan dan tur an ngaihtuah a ṭul.
Midfield-ah kum 32 mi Hassan Al-Haydos hian ram tan match 174 ngawt a khelh tawh avangin a rintlak tih a chiang a, ram tana match 112 khel tawh Abdulaziz Hatem leh 119 inlan tawh Karim Boudiaf te hi an tawnhriat ringawt pawh chhawr tham a ni. 
India coach Igor Stimac-a'n Kuwait lakah rin loh takin Lza bench lamah a dah a, Lunglei tlangval a luhtir hnua game inthlakzia a hriatthiam chuan Mumbai City forward hi bench-ah a dah nawn ngam kher lo ang. 
Coach nen inhmu thiam lo anga sawi a nih hnuah Stimac-a'n Lalengmawia Ralte chu India tana inlan turin tun qualifier-ah a ko a, Kuwait lakah bul a ṭan nghal - Stimac hian Apuia en kan nawn lam hi a ngaihtuah nawnin a rinawm lo. 
Durtlang tlangval Lalchungnunga pawh squad-ah awm mah se, East Bengal defender rinrawl hi Blue Tigers tana bul ṭan tur chuan a la pa tuai deuh hlek niin a lang a, zaninah bul a ṭan a rinawm lo - chutihrual chuan Chungnunga hi Stimac-a'n squad-a tel tura en kan harsa a ti ṭan a, player pawimawh ni thuai tura theihna nei a ni. 
Kalinga Stadium, Bhubaneswar-a inkhel tur India leh Qatar hi vawi thum an lo intawng tawh a, an intawn hmasak berah 6-0 in an tlawm. An intawn vawi hnihnaah 0-0 in an inhnehtawk a, a hnuhnung berah 1-0 in Qatar an chak - India-in zaninah thawnthu thar ziah an tum dawn e.