Brazil hmaah Argentina
Football a nih tawh chuan Brazil leh Argentina hi midang chunga leng an ni a, an sulhnu a ṭhat miau avangin a mak lo. South American inkhel thiam ram pahnih hi November 22, Nilaini zing dar 6:00 hian an intawng dawn.
Brazil rama khelmual hmingthang Marcacana Stadium-a inkhel tur hi World Cup qualifier a nih avangin a pawimawh. Ram pahnih hi an match hnuhnunga chak lo ve ve an nih avangin tun ṭumah hian chak an duh zual ang.
Match vawi nga an khelh tawh chinah world champion Argentina hian point 12 neiin hma an la hruai mek a, khelh zat inangah Brazil hian point sarih neiin pangana an ni thung.
Neymar aiah Jesus?
Brazil hian hliam vangin Neymar an chhawr thei lo mek a, ram tana goal khung hnem ber tel lo chuan an tlarhma a hriam tawk lo deuh ṭhin, tun ṭumah pawh hian a la inlan thei dawn lo.
Neymar awm loh bakah Arsenal striker Gabriel Jesus chu hliam vangin Colombia lakah a inlan thei lo, tun ṭumah erawh Jesus hi inlan thei tawh tura beisei a ni, minute 90 erawh a la khel lo mai thei thung.
October thla aṭangin Jesus hi a la inkhel leh lo, a club lam chuan chawl rih turin duh mah se Brazil coach Fernando Diniz-a'n a ko, club lama a khelhpui Gabriel Martinelli nen a inkawptir a nih pawhin a mak lo ang.
Tlarhma lama chhawr theih Rodrygo leh Raphinha te an la nei bawk a, anni pahnih hi tawnhriat nei ṭha an ni. Neymar bakah Vinicius Junior a hliam bawk avangin Diniz-a'n ar talh dan dang a ngaihtuah chhuah ngei chu a ngai dawn a ni.
Messi awmna
Lionel Messi hoa khel Argentina boruak a fuh a, hun rei tak chhung chu tluang takin an kal tawh. Qatar World Cup champion an nih hnuah pawh ṭha takin an khelh chhunzawm - mahse Uruguay lakah an kaltluang hi a tawp.
Uruguay laka an chak loh hnuah Argentina captain Messi chuan midfield an thunun thei lo chu an tuar tih a sawi. Brazil lakah Enzo Fernandez, Alexis Mac Allister leh Rodrigo De Paul ten ṭha lehzual zawka hnathawh an tum a ngai dawn.
Coach Lionel Scaloni pawhin training dan kalhmang a tidanglam nghal hret, Nico González aiah Ángel di Maria chu mual sira che turin training a neihtir, hei hi Brazil ṭhat tawk lohna lai nia langa an beih theihna tur nia ngaih a ni.
Di Maria hian inkhel pawimawh leh boruak sang a zo bawk. Brazil rama Copa America champion an nih theih nana goal khungtu pawimawh kha a ni a, a tawnhriat neihte a ṭangkai leh thei tura ngaih a ni bawk.