Zanin dar 7:00-ah NorthEast Derby Aizawl FC Vs Trau

Aizawl FC chuan zanin dar 7:00 hian RG Stadium, Mualpuiah Manipur club Trau an mikhual dawn. Mizo club hi Kolkata-a East Bengal hneh zo hlim an ni a, Trau hi pathumnaa awm an nih avangin zanin inkhel tur hi a pawimawh hle.

Tun hnaia India ram football club ngaihven hlawh ber tiha chhal theih chu East Bengal an ni a, Red and Gold hi July 26 hian Manchester United nen Salt Lake Stadium-ah friendly match khel thei dinhmuna an din avangin sap ram chanchinbu lam thlengin an chanchin an ziak.

Nikum khan director of football operations Alan Dawson hoin Manchester United aiawh mi pali chuan Kolkata an tlawh a, East Bengal nena inkhelh theih dan tur an sawiho. Red and Gold hian August 1-ah kum 100 a tling dawn a, India ram club ropui ber zinga mi hian Manchester United hmangin an ropuina belhchhah an duh.

Premier League champion ngun ber United hian India rama kal an remtia sawi a ni a, amaherawhchu friendly match atan hian pound maktaduai thum an beisei thung. East Bengal hian sponsor ṭha an nei a nih chuan football ngainatute beiseina a hlawhtling dawn.

Khelmual pawn lama East Bengal boruak a vung chhoh lai takin Mizo club hian Kalyani Stadium-ah Kolkata club hi an hmachhawn a, Argentine midfielder Matias Veron hmangin 1-0 in an hneh. Standly Rosario enkawl Aizawl FC-in point thum hlu tak an hlawhchhuah avangin table-ah pariatnaah an invawrh chho a, club 

ṭantute tan phurna thar a awm phah bawk.

Aizawl FC hi tun season-ah vawi thum an chak lo tawh a, RG Stadium-a an match hnuhnung bera Real Kashmir an hneh loh hmain Manipur club pahnih Neroca leh Trau chu Imphal-ah an hneh lo ve ve. Mizo club coach Standly Rosario chuan, "Trau lakah hian kan fimkhur a ṭul hle. Imphal-ah kan hneh tawh lo a, Manipur club hi kan hneh lo nawn a nih chuan East Bengal laka kan lawmna hi a hliahkhuh nghal ang," tiin chak ngei a ṭul thu a sawi.

Trau hian match 11 aṭangin point 15 an hmu a, Mizo club aiin point liin hmu tam mah se match khatin an khel tam zawk. Mizoram Premier League champion hian tun season I League bikah an mualah chak an la nei lo a, Trau hi an hneh a nih chuan table chanve chung lamah an awm thei dawn.

I League-ah hmahruaitu Mohun Bagan-in point 26 an hmu tawh a, an sang fal. Table mawngphaha awm Indian Arrows-in point sarih chauh hmuin an hniam fal leh bawk. Club dang pakua erawh an point hmuh a inhnaih hle. Pahnihna Punjab leh 10-na Neroca inkarah point ruk chauh a awm.

Aizawl FC-in match hmasa bera Mohun Bagan laka an clean sheet hnuah East Bengal lakah goal an chhuah lo a, an tlarhnung pawp an tiphui thei hi chanchin lawmawm a tling. Amaherawhchu Red and Gold nen an inkhelh ṭum hian defender Richard Kassaga chu hliam vangin lakchhuah a ni a, Trau nen a inkhel thei dawn lo.

Chutihrualin Aizawl FC tan tun hi Trau hmachhawn hun tak a tih theih. Manipur Derby-ah Trau hian Neroca 5-0 in an hneh lo a, hemi ṭuma hnawhchhuah Sandeep Singh chuan Aizawl FC a hmachhawn thei dawn lo a, forward Princewill Emeka Olariche pawh hliam vangin a dinhmun a chiang lo.

Aizawl FC coach Standly Rosario chuan, "Kan inthlahdah a thiang lo. Mahni muala chak ngei tumin theihtawp kan chhuah ang," tiin Vanglaini a hrilh a, East Bengal laka chakna goal khungtu Matias Veron-a'n inkhel bul a ṭan tur thu a sawi bawk. Mizo club ṭantu Red Army-in RG Stadium-a an match hnuhnung berah 'Standly Out' tihin an au a, East Bengal laka hnehna an chan tak avangin zanin an au hla erawh a dang ngei ang.