LA lamah pawh Verstappen bawk a chak

Intlansiak ṭan hmain Max Verstappen chuan Las Vegas Grand Prix chu infiamna aiin intihhlimna lam ni zawka a hriat thu a sawi - Red Bull driver hian intihhlim pahin hnehna a chang leh ta tho a ni.

Pathianni chawhnu lama intlansiakah Verstappen hian a hmasa ber aṭangin bul a ṭan phak lo a, hei bakah hian 'five-second penalty' a tuar bawk, a tawi zawnga sawi chuan chak turin a dinhmun a ṭha lo hle.

Mahse, season duhawm hmangtu hi dan theih a ni chuang lo, lap 50 an tlan zawh meuh chuan Dutch tlangval Max-a hi a chungnung ber leh ta tho a, a hnungah Ferrari driver Charles Leclerc leh Red Bull car khalhtu ve tho Sergio Perez te an thleng.

World champion Verstappen hian kuminah vawi 18 ngawt hnehna a chang tawh a, car intlansiakna sang berah hian a pumpuiah vawi 53 chak tawhin, hnehna chan tam lamah Sebastian Vettel a nih rual.

Max-a aia hnehna chang tamte chu Lewis Hamilton (103) leh Michael Schumacher (91) te chauh an ni ta a, anni pahnih hi chu world champion vawi sarih ni thei an nih avangin an sulhnu a ropui fal - tun ang zela a kal tluang a nih erawh chuan Red Bull tlangval hian a la khum chho a nih pawhin a mak lo ang.

Tun season chhungin Formula 1 intlansiak hi hmabak pakhat chauh an nei tawh. November 26, Pathianni hian Yas Marina Circuit-ah Abu Dhabi Grand Prix an tlan ang a, season chawlh an hmang zui tawh ang.