Goal li khungtu Lukaku

Belgium striker Romelu Lukaku chuan Pathianni zan khan Azerbaijan lakah goal li ngawt a khung a, Euro 2024 qualifier-ah an ram Belgium chu 5-0 in hnehna a chanpui.

Lukaku hian minute 17-naah goal khung ṭanin, mikhual Azerbaijan an vanduai zui a, minute 24-naah defensive midfielder Eddy Israfilov hnawhchhuah zui a ni a, Belgium-in inkhel an thunun zui.

AS Roma striker Lukaku hian first half-ah goal li hi a khung vek a, minute 90-naah Leandro Trossard chuan a hmawr bawkna goal a khung ve leh bawk - Belgium an chak chiang.

Kum 30 mi Lukaku hian ram tan match 113 a khelh aṭangin goal 83 ngawt a khung ta a, international football-a goal khung tam lamah pasarihna niin, Cristiano Ronaldo (128, Portugal), Ali Daei (109, Iran), Lionel Messi (106, Argentina), Sunil Chhetri (93, India), Mokhtar Dahari (89, Malaysia) leh Ferenc Puskas (84, Hungary) chiah tluk loh a nei tawh.

Euro 2024 qualifier-ah goal 14 khungin amah hnaihtu Ronaldo (10) leh Kylian Mbappe (9) ten an thlau viau a, a goal khung zat hi European Championship qualifier record niin, Northern Ireland striker David Healy-a'n kum 2008-a goal 13 a khung leh, kum 2016-a Poland striker Robert Lewandowski-a'n goal 13 a khungte chu a khum.

Belgium hi Azerbaijan an hmachhawn hma hian, Euro 2024 khel turin an tling chiang tawh a, group F aṭangin anni bakah Austria chu Germany-a inkhel tura ticket nei fel an ni.