Casillas-a'n European record a nihrual
Spain-in Pathianni zan khan friendly match-ah Romania goal awm loin an inhnehtawkpui. European Championship champion lai Spain hian Italy an lo draw tawh a, an match hnuhnung pahnihah lawmna tur awm lo mah se Iker Casillas tan erawh zan chhinchhiah tlak a ni.
Spain keeper ropui Casillas hian khelh tam lamah Latvia midfielder Vitalijs Astafjevs-a'n ram tana a khelh zat vawi 166 a nih rual a, European record siam turin match khat chiah a mamawh tawh.
Barcelona midfielder Sergi Roberto chu an ram Spain tan a vawi khat nan a inlan bawk. Vicente Del Bosque-a'n second half-ah Cesc Fabregas, Juan Mata, Aritz Aduriz leh Alvaro Morata te luhtir mah se goal an khung theih loh avangin a zawnin match 17 chhung chu Romania lakah hian chak result an hlawh chhuak thei lo.
Romania hian an ram zirna ngai pawimawhin an training-naa an thawmhnaw hakah number pangngai ziak loin chhiarkawp rawngkaiin (2x2x2, 46:2, 11x2 etc) number an ziak thung. Kum 2014 zirchianna aṭanga a lan danin Romania school naupang 14% zet chuan primary school bak an pel lo a, Romanian Football Federation chuan football hmangin zirna pawimawh zia an pholang.
Romanian Football Federation president Razvan Burleanu chuan, "Zirna leh infiamna hi en liam mai chi a ni lo. Naupang an ṭhan lenna kawnga thil inkawp pawimawh tak a ni. Tuna kan hmalaknaah hian Romania-a naupangte chuan football hmangin phur takin chhiarkawp an zir theih phah ang," tiin a sawi.