Germany mikhual tur Italy
Zanin dar 12:15 hian world champion Germany chuan Allianz Arena-ah Italy an lo mikhual dawn a, friendly match ni mah se khawvela football ram ropui pahnih inhmachhawn tur hian mipui ngaihven a hlawh lo thei lo.
Germany hian Inrinni khan an mikhual England lakah goal hnih khung hmasa mah se 3-2 in an chak lo zui tho a, Euro 2016 khel tur an nih avangin a zawna mahni muala tlawm chu Joachim Low naute tan a tihchih loh hle ang. Hetih lai hian Italy erawhin an match hnuhnung berah Euro champion nomawi khawltu Spain chu 1-1 in an inhnehtawkpui thung.
Team pahnihte hi kum 2013 November thla khan 1-1 in an lo inhnehtawk tawh a, 2012 June thlaa an inhmachhawn ṭum erawhin Italy hian 2-1 in hnehna an chang thung. Tun hnaia an intawn hnuhnung pahnih thlir chuan chak zawk tur rinthiam a harsa hle.
Tun dinhmunah Germany hian FIFA World Ranking-ah point 1355 hmuin palina dinhmun an luah a, Italy pawh an tawn san lai ber a ni bik lo, point 999 hmuin 14-na dinhmun an luah phak hram chauh a ni.
Italy an chungnung
Italy hian Euro 2012 leh 2006 World Cup semifinal-ah te khan Germany hi an lo pet chhuak tawh a, an intawn hnuhnung vawi sarihah an tlawm miah lo. Germany an hneh loh hnuhnung ber chu kum 1995 daih tawh kha a ni.
German coach Low-a'n world champion an nih avangin Euro-ah pawh champion tura beiseiawm an nih thu a sawi rualin France, Belgium, Italy leh Spain te pawh nomawi chawi tura an ṭhat tawk thu a lo sawi tawh avangin zanin an inkhel tur hi team pahnih tan major tournament hmachhawn tura inbuatsaihna hun ṭha a ni chiang.
Kum 56-a upa Low chuan, "Italy leh Spain te inkhel kha ka en lo a, mahse inkhel hautak leh turu tak chu a nih ngei ka ring. A chhan chu annni pahnih hi Europe-a team ṭha berte zinga mi an ni. Keni team hi qualifying aṭang tawh khan duhthusamin kan khel chhuak rih lo a, nipuia inelna lian kan hmachhawn hma ngeiin insiam ṭhat hman kan tum," tiin a sawi.
Hetihlai hian Italy coach Antonio Conte chuan Spain nena an inkhelh ṭuma a naute khelh dan chu ṭha thawkhat mah se Germany lakah chuan Azzurr hi ṭha zawka an inlan tur thu a sawi a, inkhel hmuhnawm a ni ang.
Zanin Inkhel Tur
Estonia 9:30 PM Serbia
FYR Macedonia 10:30 PM Bulgaria
Greece 11:00 PM Iceland
Norway 11:30 PM Finland
Switzerland 12:00 AM Bosnia-Herzegovina
Sweden 12:00 AM Czech Republic
Austria 12:00 AM Turkey
Germany 12:15 AM Italy
Rep of Ireland 12:15 AM Slovakia
Portugal 12:15 AM Belgium
England 12:30 AM Netherlands
France 12:30 AM Russia
Scotland 12:30 AM Denmark