Wenger duhtu Seaman

David Seaman chuan Arsenal chu an manager Arsene Wenger ban lo turin a duh thu leh, Manchester United ang maia an buai chhunzawm a hlauh thu a sawi chhuak.

Tun hnaiah Gunners fans zingah Wenger ban duhtu an tam tawh hle a, January thlaah Premier League hmahruaitu ni thei mah se tunah chuan Leicester City leh Totten-ham hnuaiah an awm tawh a, Champions League, Carling Cup leh FA Cup aṭangin pet chhuah an ni tawh bawk. French manager ban duhtu an tam pawh hi a mak hran lo.

Kum 2013-a Alex Ferguson-a'n Manchester United a chhuahsan hnuah ngai an awh chho leh tawh lo a, Louis van Gaal enkawlna hnuaiah tun season-ah Champions League-ah inlan ve mah se group stage pawh an paltlang zo lo a, league-ah pawh parukna dinhmun an luah hram a ni.

Arsenal goalkeeper hlui Seaman chuan, "Wenger nen hian kum riat chhung vel kan lo thawkdun tawh a, amah hi ka hrechiang hle a, a fan ruhkawl ka ni. Ani hian league title a chawi leh hma chu a chungah boruak rit tak a awm reng tawh dawn a, hun harsa paltlang tur chuan amah aia ṭha an awm chuang lo ang," tiin a sawi.

Seaman chuan sawi chhunzawmin, "Man-chester United hi en teh u, manager ropui Alex Ferguson-a'n a chhuahsan hnu hian hmalam an la pan leh lo a, an hnungtawlh zel a ni. A chang chuan club-in result ṭha a neih loh vang hian lawm lo ve fo mah ila ka rilru thlakna tur chhan ka la hre lo," tiin Wenger a thlawp tlat thu a sawi.