West Indies barakhaihtu Afghanistan

Pathianni zan ICC World Twenty20-ah Afghnaistan-in semi-final lut chiang tawh West Indies an barakhaih a, Windies lakah hian run rukin hnehna an chang.

Nagpur khawpuia inkhelah hian Afghanistan-in over 20-ah run 123 an siam a, mi pasarih an hloh. Afghan batsman zingah Najibullah Zadran a che ṭha fal a, kum 23-a upa batsman hian ball 40 a hmachhawnah run 48 siamin a tawp thleng a dam.

West Indies bowler zingah Samuel Badree a che ṭha a, kum 35-a upa spin bowler hian over li a vawmah run 14 chiah a pe a, wicket thum a la bawk.

Chris Gayle tel loa khel West Indies-in an target um phak ngei tumin an khel a, over 20-ah run 117 chiah tlina mi pariat an hloh avangin run rukin chak lo zawka an ṭan a ngaih phah.

Windies tana run siam hnem ber Dwayne Bravo chuan run 28 a tlin hram a, West Indies batsman-te'n Afghan bowler-te an ngam lo hle.

Group stage aṭanga Super 10 inhlangkai Afghanistan-in Super 10-a an match hmasa pathumah hnehna chang lo vek mah se group stage-a Zimbabwe an hneh bakah West Indies an hneh leh tak avangin an huaisenna avangin fak an hlawh.

West Indies captain Darren Sammy chuan, "Kan chak loh avangin kan lawm lo a, mahse kan rilru tih hnual phah lo. Afghanistan khan an khel ṭha takzet a ni," tiin an khingpuite a fak.

Afghanistan captain Asghar Stanikzai chuan, "Vawi hnih lai chak thei dinhmuna kan din hnuah kan chak lo a, Windies laka kan hnehna hi kan tan chuan a pawimawh a ni," tiin an chak vanga a lawm thu a sawi.

Cricket khawvela hriat la hlawh lo tak Afghanistan hian Sri Lanka leh England an hmachhawn ṭumin an khel ṭha hle a, a tawpah a vanduai zawkah an ṭang a ni.

England cricketer ropui ṭhin Michael Vaughan chuan, "Afghanistan khan an theihna zawng zawngin, an thiamna leh thinlung nen lam an khel chhuak a, fak an phu takzet a ni," tiin Afghanistan player-te chu a fak.

Nizan dar 7:30 khan inkhel awmze nei tawh loah South Africa leh Sri Lanka an inhmachhawn a, he chanchin buatsaih a nih lai hian an result kan hre hman lo.