ICC World Twenty20 Semi final-a India luhpuitu Kohli

Virat Kohli ropuizia kan hmu kleh ta - ICC World Twenty20-ah India-in Austra-lia hnehin semifinal an lut ta. India semifinal zinkawng a hmuhnawm a, a ngaihnawm tel bawk - India chak dan chan-chin hi Kohli chanchin a ni!

Pathianni zan khan India hian Australia chu semifinal luh inchuhna inkhelah wicket rukin an hneh a, run 82 siama a tawp thleng dam Virat Kohli chu India chhandamtu a ni.

Chak tura run 161 ma-mawh India tan Kohli hian ball a hmachhawn hnuhnung 11-ah run 32 a siam. Ball ruk la awmah India-in chak tura run li chiah an mamawh tawh tihin MS Dhoni chuan four run vaw chhuakin India an chak.

Punjab Cricket Association Stadium, Mohali-a India fan pungkhawmte hlimin an lam a, Australian player-te an hawihai. India semifinal luhna inkhel hi Australian cricketer ṭha Shane Watson-a tan international cricket a khelh hnuhnung ber a ni nghal bawk.

Inkhel chu

Australia-in over 20-ah run 160 an siam a, mi paruk chiah an hloh. Australia tan Aaron Finch-a che ṭha a, ball 34 a hmachhawnah run 43 a siam.

Kangaroos (Australia cricket team sawina) batsman zingah run 26 siamtu Usman Khawaja leh run 31 siamtu Glenn Maxwell-te an khel chhe hran lo a, a international match hnuhnung berah Shane Watson chuan run 18 siamin a tawp thleng a dam bawk.

India vuak hun a thleng a, an target run 161 hi Twenty20 inelnaa Australia laka ûm tur chuan huphurhawm tak a ni. Indian opening batsman pahnih run 12 siamtu Rohit Sharma leh run 13 siamtu Shikhar Dhawan-te'n an hna an thawk ṭha tawk lo a, India fan-te an hlauthawng hman.

Virat Kohli luh hnuah pawh India hi an che ṭha lawk lo a; nimahsela a tawp lamah India fan-te'n lawmna tur an hmu a - Delhi batsman hian ball 51 a hmachhawnah run 82 ngawt siamin a tawp thleng a dam. Ball 18 a hmachhawna run 21 siamtu Yuvraj Singh leh run 18 siama a tawp thleng dam captain MS Dhoni-te'n an pui ṭha takzet bawk.

Innghahna tlak Kohli

India-in a tir lama an batting fuh tawk loh an tuar a, over thum chiah a awm tawh tiha chak tura an run mamawh zat chu run 39 zet a la ni - Australia chan a ṭha zawk.

Mahse, India-in Australia neih loh an nei a, chu chu Virat Kohli a ni. Kum 27-a upa batsman hian over 18-naah James Faulkner hmachhawnin four run vawi hnih a vaw chhuak a, six run vawi khat a vaw chhuak bawk.

Over 19-naah pawh Kohli-a kut a kaltluang laklawh a, Nathan Coulter Nile-a ball vawm aṭangin vawi li lai four run a vaw chhuak a, over tawp berah Dhoni-a tan chak tura an mamawh zat four run vuak chhuah thil harsa a ni tawh lo.

Puanthuah tel Australia

Australia-in inkhel bul an ṭan ṭha takzet a, Indian bowler Jasprit Bumrah leh Ravichandran Ashwin-te vawm chhiat zarzoin Australian batsman Usman Khawaja leh Aaron Finch-te an hmuhnawm hle.

Mahse Ashish Nehra-a'n Khawaja a vawm out hnuah spinner pahnih Ravi Ashwin, Yuvraj Singh, Hardik Pandya leh Jasprit Bumrah-te'n wicket an lak chhunzawm ve nghal a, Peter Nevill-a'n ball hnih chauh a hmachhawnah run 10 rawn vaw chhuak mah se over-in a daih tawh lo a, run tam a siam thei lo.

A hun takah India

Champion nomawi chawi tura beisei kai ber ni chungin India-in tournament an khel a, mah se an match hmasa berah New Zealand an hneh lo nghal.

India an mutthlu rei lo. An match hnihnaah an hmelma kumhlun Pakistan an hneh a, an match thumnaah Bangladesh chu mak tak maiin run khatin an hneh bawk.

Pathianni zan an inhmachhawn hmain India leh Australia-in inkhel vawi thum ve ve an hmachhawn a, vawi hnih ve ve chakin team pahnihin an hneh loh chu New Zealand a ni. Semifinal luh inchuhin an inkhel a, a hunah tak India an rah chhuak.

Eng nge an sawi?

Man of the match Kohli chuan, "Hei hi a ni cricket kan khelh chhan chu. Zaninah hian ka hlim takzet a ni. Kan tan chuan quarterfinal ang a ni a, kan khelmuala khel kan nih avangin mipui beiseina a sang hle. Mipui heti zozai min ṭan tura lo kal khawmte tan inkhel hmuhnawm tak chhawpchhuah kan duh a, anmahni vanga ṭha taka khel thei kan ni," tiin fan-te chungah a lawm thiam hle.

India captain MS Dhoni chuan, "Kohli hi tun hnai kum thum kum li chhungin a khel ṭha thei em em a, inkhel pawimawh tak kan hmachhawn apiangin a khel ṭha em em zel a ni. Kohli hian run tam tak vuak chhuah a duh reng a, mah se batsman pakhatah chauh innghat thei kan ni lo. Kan batsman dangte an dinchhuah ve a ngai," tiin hmasawn zel an mamawh thu a sawi.

Australia captain Steve Smith chuan, "Run 160 kan siam a, target pangngai tak niin ka hria. Mahse, Kohli khan a khel ṭha takzet a, khatiang boruak sang tak hnuaia ṭha taka khelh kha a tiṭhang tawh a ni," tiin an khingpui batsman a fak.

Hmabak

India-in March 31 hian West Indies nen semifinal an khel dawn a, March 30 khian New Zealand leh England ten semifinal hmasa zawk an khel ang.

Mangṭha le Watson

Australia all-rounder Shane Watson-a'n World Twenty20 zawh rualin international cricket a chawlhsan tur thu a sawi a, India an hneh loh tak avangin international cricket-ah Shane Watson-a hmel kan hmu tawh dawn lo.

Kum 34-a upa Watson hian Australia tan ODI match 190 a khel hman a, run 5,757 siamin match tina run 40.54 siam ziah ang niin wicket 168 a la bawk. T20 international-ah Australia tan match 56 a khel bawk a, kum 2015 khan Test cricket a lo chawlhsan tawh.

Test a chawlhsan hmain vawi 59 Australia tan a inlan a, run 3,731 a siam bawk. World Cup-ah ram tan vawi thum inlanin 2007 leh 2015 champion team-ah khan an player pawimawh pawl a ni.

World T20 vawi ruk khelh tawhah ram tan a inlan kim vek a, kum 2012 khan player of the tournament-ah thlan niin international cricket chawlhsan mah se T20 tournament Big Bash league leh Indian Premier League-ah te erawh a la inlan zel ang.