Wembley-ah England tan fiahna

Germany laka comeback ropui lantir zo hlim England-in zanin 12:30-ah Netherlands an mikhual dawn a, Wembley Stadium-a inkhel tur ram pahnih hi team
ṭha tak an nih avangin inkhel nghahhlelhawm a ni.

England-in tun hnaiah team ṭha France leh Germany a zawnin an hneh ta a, Euro 2016-ah beiseina an neih san phah hlein a rinawm. World Cup 2014-a beisei an phak loh hnuah England hian match 17 zet an khel leh tawh a, match 14-ah hnehna an chang thei.

World Cup hnuhnung bera semifinal lut Netherlands erawh tun hnaia an result-ah lawmna tur a awm lo. Euro khel thei tur ram 16 aṭanga 24-a tih pun a nih hnuah pawh Euro an khel phak chuang lo a, England an hmachhawn hma an friendly match hnuhnung berah France chu 3-2 in an hneh lo bawk.

Tute nge khel dawn?

First choice keeper Joe Hart inhliam hnuah England tan keeper Jack Butland a inhliam ve leh avangin Fraser Forster-a'n goal a ven a rinawm.

England tlarhma hi Roy Hodg­son-a lu ti haitu ber a nih a rinawm. Premier League-a striker hlauh­awm ber pawl ni mek leh Germany laka goal khungtu pahnih Harry Kane leh Jamie Vardy-te a nei a, hliam dam hnua ngai awh leh tawh Daniel Sturridge leh Danny Welbeck-te an la awm cheu bawk.

England-in tlarhma lamah duhthlan tur an ngah avangin hliam vanga chawl mek captain Wayne Rooney dinhmun meuh pawh a him lo nia sawi a ni.

Mahse, England manager Roy Hodgson chuan, "Ka sawi nawn duh chu Wayne hi kan captain a ni a, tun hnai kum hnih chhungin he team hi a kaihruai ṭha takzet a ni. Euro qualifier-a match 10 kan khelhah hnehna min chanpui vek a, tuna a chungchang sawi dan a ni hi chu a phu lo a ni," tiin a striker chu a chhan.

Hodgson chuan duhthlan tur a ngah vanga a buai loh thu sawi nghalin, "Rooney-a in fit hunah chuan tlarhma player-te an ṭan sawt a ngai dawn a, Rooney ngei pawh a ṭan sawt a ngai ang," tiin player ṭha kawl hnem chu team tan a ṭhat thu a sawi.

Netherlands ve thung

Dutch coach Danny Blind-a'n Euro 2016 an khelh dawn loh avangin Russia 2018 World Cup qualifier a ngaih pawimawh a
ṭul dawn a, player en chhin nan a hmang lehin a rinawm.

France an hmachhawn ṭuma inhliam Wesley Sneijder chu a inlan theih a beiseiawm loh a, France laka substitute bench aṭanga tlan lut Memphis Depay leh Ibrahim Afellay-te chuan inkhel bul an ṭan beisei a ni.

Netherlands hian France an hmachhawn ṭumin March 24-a cancer natna avanga thi Dutch legend Johan Cruyff hriat reng nan minute 14-naah ngawi rengin an ding a, England nen an inhmachhawn hunah pawh player leh coach ropui hriatrengna hun hi hman a ni dawn.

Thawnthu Hlui

Team pahnih an inhmachhawn hnuhnung parukah Netherlands-in tlawm hmel an hmu miah lo a, vawi hnih chak zawkah ṭangin vawi li chak zawk awm loin an
inṭhen thung.

March, 2012 kha team pahnih an inhmachhawn hnuhnung ber a ni a, Netherlands-in 3-2 a hnehna changin Wembley-ah England fan-te an lo ngawihtir tawh.

Zaninah England-in Wembley-ah vek phuba lakna remchang an nei dawn a, tun hnaia che ṭha tak team hian an hun ṭha bawhpelh an duh lo ang.