MCL champion Chanmarians

Mapuia Cricket League 4th Edition-ah Chanmarians CC-in tun season-a vawi li zet an hneh tawh loh Chhinga Veng CC chu run 16-a hnehin an champion.

Nimina Suaka Cricket Ground, Sihhmuia inkhelah coin toss-ah Chan-marians an vannei a, bat hmasak an thlang. Chanmarians tan opener Pritam Gurung leh K-a te'n bul an ṭan ṭha a, run 135 an siamna kawngah over 12 thleng wicket an hloh lo chu a pawimawh hle. Over 20-ah Chanmarians-in wicket 9 an hloh a, Chhinga Veng tana an target chhawp chhuah zat chu 136 a ni.

Chhinga Veng bat hun a thleng a, Chanmarians slow bowler Laldingliana'n hun pawimawhah wicket pathum a la a, final bikah wicket pali lain man of the match a thlan a ni. Chhinga Veng CC-in over 20-ah wicket pariat hlohin run 119 chiah vaw chhuakin hun pawimawhah an par thei lo.

Chhinga Veng hian champion lo mah se season ṭha tak an hmang a, President's Cup-a an champion hnuin Mahuma Memorial leh MCL-ah final an lut.

Chanmarians tan hun lawmawm a ni a, season liam ta khan Super Cup, President's Cup leh Mahuma Memorial-ah champion mah se MCL final-ah Ramhlun Venglai an hneh lo. Tun season-ah vawi thum final an luh tawhna MCL-ah a vawi khat nan an champion.

Chanmarians coach Reuben Lalchhandama chuan, "Nikum khan MCL chiah kan champion lo a, chuvangin player-te pawhin tun ṭum hi an la thutak em em a, an thawhrim rah kan seng a ni. Tun season-a vawi li lai kan hneh tawh lo Chhinga Veng kan hneh thei kan lawm hle a ni," tiin Vanglaini palai a hrilh.

Mimal Lawmman

Best batsman : Saidul Kalam Saruk, Chhinga Veng

Best bowler : F. Lalmuanzuala, Chanmarians

Best fielder : Malsawmdinpuia, Chhinga Veng

Man of the match (Final) : Lalhmingliana, Chanmarians

MCL champion tawhte

Kum Champion Runners Up

2013 Kulikawn CC Ramhlun Venglai

2014 Kulikawn CC Chanmarians

2015 Ramhlun Venglai Chanmarians

2016 Chanmarians Chhinga Veng