German ral a lian, Messi a bo!

Zirtawpni zanah Bayern Munich leh Barcelona an inkhel a, Champions League quarterfinal zinga en châkawm ber lawr lak a nih ang ngeiin Lisbon-a inkhelin hmuhnawm football ngainatute mit a ti tlai hle. 

German club ropui Bayern hmaah Lionel Messi telna Barcelona dawl zawrin an zawr a, Catalan club ropuinain chuai lam a pan. January thlaa Barca chhandam tura lakluh Quique Setien chu Spanish club chhiatna belhchhahtu a ni a, Messi kumin tam lam a pan zel bawk avangin par chhuah leh a harsa dawn.

Barcelona 2-8 zeta tukdawltu Bayern Munich erawhin manager an thlang fuh a, Hansi Flick-a hnuaiah hmuh theihin hma an sawn. Football hmuhnawm pholangtu Germany rama roreltu Bavarians fak mai loh chu tih theih dang a awm lo.

Barcelona-in an khelh dan system ngaisangtu Quique Setien an lalut a, pressure sangah erawh tawnhriat nei tlem Setien-a ṭhat tawk lohna pholanin a awm. Ṭan hma hauh aṭangin club ropui Barca an inveng nghal a, a dawi zawkah an ṭang. Barca-in Ernesto Valverde banin Setien an thlang hi an ti sual hle.

Setien hian Bayern chelh tumin midfielder pali Sergi Roberto, Sergio Busquets, Arturo Vidal leh Frenkie de Jong te a dahlut. Hemi a nih avang hian Antoine Griezmann bench-ah a awm a ngaih phah. French forward tel lo hian La Liga season tawp lamah Sevilla, Celta Vigo leh Atletico Madrid nen an inhnehtawk bakah Osasuna an hneh lo a, Real Madrid nomawi chawi lai an thlir phah.

Bayern manager Hansi Flick erawhin, "Messi chauh kan ngaihtuah dawn lo, player zawng zawng kan thlir dawn," tiin a sawi a, Lionel Messi vanga khelh dan an thlak loh tur thu a sawi. Bayern hi Germany-ah an ropui a, chutihrualin Europe-ah erawh rin an la harsa.

Bavarians player hlui Arturo Vidal a ṭawng tam hret, Barca midfielder hian, "Bayern hian inrintawkna an ngah em em, mahse Bundesliga team an hmachhawn dawn lo. Khawvela team ṭha ber Barcelona nen kan inkhel dawn," tiin a ṭawng pawr hle.

Inkhel result-in Vidal-a hriat sual zia a pholang a, 'a vawtuin ek a cheh'. Thil awm dan tur hre lawk ni se chuan Lisbon an pan hmain Barca-in rawmawl var phochhuah an duh hial ang, chutiang em a thleng lo a nih pawhin Vidal-a'n media a hmachhawn lo ang a, Griezmann-a'n cham rei an tum avanga Playstation a ken thu a sawi lo ang.

Bayern Munich-in attacking football an khel a, Thomas Muller-a'n Robert Lewandowski nen an in wall pass hnuah mawi zetin goal hmahruai a khung - minute li chauh a la ni. Goal khat lekah Barcelona an buai phah lo - an nawr na sawt. Minute thum hnuah left back Jordi Alaba cross chu David Alaba-a'n an lamah tlawh lut, Luis Suarez awm bawk mah se Bayern defender chetsual vangah a ngaih theih.

Barca-in nawr chhunzawm a, Nelson Semedo pass chu Suarez-a'n nang fuh chiah mah se Manuel Neuer a paltlang thei lo. Lionel Messi thiamzia a lang a, a ball cross ṭha zet chu Sergio Busquets-a'n a tauh fuh tawk lo chungin goal ban a per. Barca defender Clement Lenglet-a'n goal khung theihna tur a nei bawk a, goal chance a awm mawlh mawlh a ni ber.

Barcelona vul hun chhung a rei lo, minute 21-naah Ivan Perisic-a'n Bayern tan goal a khung a, hemi hnu hi chuan German club-in inkhel a thunun hlak. Bavarians thiamzia a lang a, Leon Goretzka chip ball 

ṭha zet chu Serge Gnabry-a'n minute 27-naah a khung a, Barca tlarhnung an ṭhiat hneh hle.

Barca-in tlarhnung aṭanga ball inpek an tum chhunzawm a, Bavarians-in pressure an pek nat avangin Catalan club an talbuai a, German club-in chance an ngah. Spanish club vanneihna erawh Robert Lewandowski chance ṭha a hlah a, Bayern player-in goal chance an inhlahsiak.

Second half-ah inkhel a danglam lo, Lewandowski a vanduai chhunzawm a, VAR hmangin a goal khung pawm a ni lo. Barca-in Suarez hmangin minute 57-naah siphurh sut ṭhen mah se Bayern a ti phur sawt. Kum 19 mi Alphonso Davies-a'n Barca defender Semedo duh tawka a chaih phar hnuah Joshua Kimmich goal khung tur a siamsak a, minute 63-naah 5-2 a ni. Hun tawp lamah Lewandowski a vannei ta a, minute 82-naah substitute Philippe Coutinho thawhrah a seng.

Barca duh loh Coutinho hian inkhelh a la thiam reng. Brazilian midfielder hian goal hnih dang a khung belh a, Bayern Munich-in goal riat an khung tling ta. German champion hian Barcelona lakah goal riat tehmeuh an khung a, chutihrualin an vanneih ṭum chu ni se hei aia tam khung tur a ni a, hemi thlentir tur hian Lionel Messi an dah ṭha - Barcelona captain a bo!

Bayern Munich boss Hansi Flick chuan, "8-2 zeta kan chak avangin kan lawm. Amaherawhchu hmabak a la tam a, football-ah eng pawh a thleng thei. Kan inkhelh leh turah kan rilru zawng zawng kan pek a ṭul a, tawp thlen kan duh," tiin Barca hneh a tawk loh thu a sawi.

Bavarians hian Bundesliga leh DFB Pokal nomawi an chawi tawh a, treble champion turin Champions League chiah champion a ngai tawh a, Flick-a hote tan vawi hnih chiah chak a ngai tawh.

QUARTERFINAL

August 12 Nilaini zan

Atalanta    1 - 2    Paris St-Germain

ATA : Mario Pasalic 26'

PAR : Marquinhos 90'; Eric Maxim Choupo-Moting 90+3'

August 13, Ningani zan

RB Leipzig    2 - 1    Atletico Madrid

RBL : Dani Olmo 50'; Tyler Adams 88'

ATL : Joao Felix 71' (P)

August 14, Zirtawpni zan

Barcelona    2 - 8    Bayern Munich

BAR : David Alaba 7' (OG); Luis Suarez 57'

BAY : Thomas Muller 4', 31'; Ivan Perisic 21'; Serge Gnabry 27'; Joshua Kimmich 63'; Robert Lewandowski 82'; Philippe Coutinho 85', 89'

August 15, Inrinni zan

Manchester City    1 - 3    Lyon

MAN : Kevin de Bruyne 69'

LYO : Maxwell Cornet 24'; Moussa Dembele 79', 87'

SEMIFINAL

August 18, Thawhlehni zan

RB Leipzig    12:30 AM    Paris St-Germain

August 19, Nilaini zan

Lyon    12:30 AM    Bayern Munich

FINAL

August 23, Pathianni zan

Leipzig/PSG    12:30 AM    Lyon/Bayern