Serena leh Gauff an chak lo

US Open inbuatsaih nana an hman Top Seed Open khelh laiah champion tura rinkai Serena Williams leh Coco Gauff te chu an tum ram thleng zo loin an zin kawng a tawp, tun thla tawpa khelh tur hard court inelna lianah erawh an inlan chhunzawm leh ang.

Zirtawpni zan quarterfinal inkhelah Serena hi Shelby Rogers lakah 1-6, 6-4, 7-6 in a chak lo. World number 1 hlui Serena hian set hmasa ber thunun viau mah se a hnuhnung pahnihah a talbuai a, world number 116 Rogers-i'n a huaisen rah a seng.

Kum 2012 khan Serena hian kha tih hun laia world number 100 hnuaia awm Virginie Razzano a ngam lo a, a hnu lamah ranking 100 hnuai lam laka a chak loh lehna hmasa ber a ni, a vanglai a pel tawh tih a lang ve zel.

American star hi tunah chuan kum 38 mi a ni tawh, Grand Slam nomawi 23 a lak hi tam viau tawh mah se a la duh belh, lak belh tur erawh chuan vanneihna a mamawh tel tawh niin a lang; a chungah vawi 24 champion Margaret Court a la awm.

Serena chuan, "Tun aia ṭha zawk khan ka khel thei tih ka chiang, chutihrualin match zawng zawngah hnehna chan theih erawh a ni lo, hun rei tak hnua inkhel leh chauh kan nih avangin thil zawng zawng hi a awlsam bik lo a ni," a ti.

Quarterfinal inkhel dangah Coco Gauff chuan seeded pariatna Ons Jabeur chu 4-6, 6-4, 6-1 a hnehin a tlang thung a, semifinal erawh a paltlang zo bik chuang lo. Final luh inchuhna inkhelah Gauff hi Jennifer Brady lakah 6-2, 6-4 in a chak lo.

Season hmasa khan kum 16 mi Gauff hian tennis khawvel barakhaihin a che ṭha hle a, kuminah pawh player hmuhnawm zingah a tel chhunzawm zel; tun ṭumah hian hlawhtlinna chang nghal lo mah se hmabak nei eng a nihzia a lang zel.