MPL10 quarterfinal: Aizawl FC Vs Chhinga Veng FC

Toyota MPL10-ah quarterfinal a awm lo tih chu tualchhung football ngaina chin chuan an hre vek, mahse vawiin tlai dar 2:00-a Aizawl FC leh Chhinga Veng FC inkhel tur erawh quarterfinal tluk hiala sawi theih a ni. RG Stadium-ah kumin I Day Football final rematch thlir tur a awm dawn a, a hmuhnawm loh ring suh.

Aizawl FC hi I League club an ni a, champion rinkai pawh an ni. Mahse, MPL-a foreigner chhawr theih loh a nih hnuah an chungnung bik lo. Season liam taa AFC tawpna chu semifinal a ni a, champion chu Lalsangzuala Hmar enkawl Chawnpui an ni. Tun ṭuma Chhingcows enkawl tur hi coach Sanga a ni leh chiah bawk.

An intluktawk

Chhinga Vengin I Day Football nomawi chawi mah se hun pangngaiah Aizawl FC nen an inhnehtawk. I League club an chungnung hret a, mahse Chhingcows-in injury time-ah best player-a thlan zui tak Lalnunzira hmangin siphurh an sut. Extra time-ah goal a lut lo a, penalty shootout-ah Mizoram keeper RS Lallawmzuala'n AFC player pathum Lalbiakdika, HK Lalhruaitluanga leh Rohmingthanga te goal khung tur a dansak vek.

I Day Football-ah penalty hmangin Chhinga Veng an vannei a, hun pangngaiah AFC an chungnung zawk. MPL10 ṭan zui nghal a ni a, registration fel loh vangin match hmasa berah Chhingcows chak loa puan an ni. Round 2-ah final rematch hmuh leh a ni a, 2-2 thoin inkhel a tawp - hemi ṭumah erawh Aizawl FC an vannei ta zawk.

Isac Zomuanpuia goal ṭha zet hmangin Chhinga Vengin hma an hruai a, I League club-in Chhingcows goal aia mawi mahin K. Lalrinfela hmangin siphurh an sut. Coach Sanga hote goal bawh a na a, AFC keeper Lalhriatpuia'n an lamah a tilut. Isaac Malsawmkima ball pet kawh ṭha zet chuan crossbar a per a, keeper Hriatpuia tan insa sengna hun a awm tawh lo.

A danglam ta

Ni 82 a ral leh meuh chuan thil awm dan a danglam ta hle. Aizawl FC-in coach Victor Lalbiakmawia aiah B. Malsawmzuala senior team enkawl turin an dah chho. Mizo coach Sawmtea hian I League enkawl theihna khawp football licence la nei lo mah se Dutch coach Erol Akbay a ban avangin I League-ah pawh AFC enkawl lailawktu a ni ta zel.

I League awm hmain MPL phase 1 khelh zawh hman a ni a, AFC hi MPL chauha an insawrbing laiin palina an ni pha chauh. Mizo club hian MPL leh I League an khelh kawp a ngai tawh a, champion rinkai la ni tho mah se semifinal khel lo thei an ni tho bawk.

MPL match hnuhnung berah Chawnpui FC lakah goal an khung thei lo a, zan lama I League match an khelh zawhah champion lai hi an hmachhawn. Squad chhah ṭha Aizawl FC tan pawh darkar 24 tling loa inkhelh lehnghal thil harsa a ni. Tun ṭumah pawh hahdamna hun an la nei dawn chuang lo, AFC hian nizan khan Namdhari FC an hmachhawn a, heta player lut leh an khelh dan a zirin Chhinga Veng hmachhawn tur an thlang thei chauh ang.

Chhinga Veng pawh I Day Football nomawi an chawi hnuah a hniam zawngin an kal a, khelmual pawn buainain khelmual chhungah nghawng lian tak a nei. Mizoram Police laka inkhel miah loa point an hloh tawp hnuah Aizawl FC laka point thum an inbeisei hnuah point khat chauh an hmu a, phase 1 bikah Chhinga Veng an talbuai tluan tiin a sawi theih.

Santosh Trophy vanga MPL10 chawlh laiin Chhingcows-in training an chawl tawp a, mahse coach Lalsangzuala Hmar bakah an player pakua Mizoram team-ah an kal - training ṭha tak dawng ang tho an ni. Phase 2-ah Chhinga Vengin Project Veng FC an hneh a, Mizoram aiawh player pahnih PC Lallawmkima leh Lallawmsanga (LS-a) ten MPL10-a an goal hmasa ber an khung.

Goalkeeper RS Lalawmzuala a dam tawh a, Aizawl FC an hmachhawn hunah chuan Santosh Trophy-a Mizoram aiawh player pariat an inlan thei dawn. Suanngaihmuana erawh khup hliam vangin a lut a nih pawhin bench aṭangin a luh a rinawm zawk.

Quarterfinal chu

MPL10 Phase 1 a tawp khan Aizawl FC leh Chhinga Veng inkarah point thum a awm a, round 8 khelh zawhah point khat chauh a awm tawh. Sanga hote hian I League club hi an hneh a nih chuan a sang pali zingah an tel dawn. MPL-ah hian point inang hmu an awmin head to head en tur a ni a, an intum hmasak ṭumah 2-2 a ni a, tun ṭuma chak zawk hi round 14 inkhelh zawha an point a inang a nih chuan a sang zawka awm tur an ni bawk.

Chhinga Veng hian November 16, Ningani khan Project Veng an hneh a, ni nga hahdamna leh training-na hun neiin ni ruknaah Aizawl FC an hmachhawn dawn. I League club erawhin hahdam leh training chhung hian MPL match khat leh I League match hnih an khel thung.

Sawmtea kaihhruai AFC hian ni ruk chhungin match li an khel dawn a, Pathianni chhiar telin ni hnih chiah an awl. AFC hi squad nei ṭha eng ang mah se an fixtures thlirin Chhingcows dinhmun a ṭha zawk a, chutihrualin I League club hi an chak lo a nih chuan semifinal lo thei an nih tho avangin chhuanlam siam a thiang lo. Inkhel a hmuhnawm dawn.