A hun tea rah ṭhin Police

Zote Toyota MPL10-ah Electric Vengin Mizoram Police lakah inkhel thunun chungin goal khung hmasa mah se Lalbiaksanga Colney hoten second half-ah harhtharna an chang a, 2-1 a hnehna changin point thum hlu tak an hlawh chhuak.

1st Bn MAP Ground, Armed Vengah Electric Vengin KC Malsawmsanga goal hmangin Police lakah hma an hruai a, second half-ah Lalfakzuala leh Lalruatpuia te goal hmangin Police-in an lehthal.

Electric Veng player-te fitness a ṭha a, Police an hneh a nih chuan semifinal beiseina thar an neih dawn avangin bul pawh a ṭan ṭha hle. Tlarhmaah captain C. Lalhriatpuia a rawn kir a, Police-in Lalhmunmawia (Ahmuntea) an chhawr theih loh bawk avangin Hriata hi a hnawksak hle.

Police-in awmze neiin an khel thei lo a, Electric Veng erawh an taihmak bakah an thil tumah an chiang zawk. Minute 22-naah khel ṭha zawk Electric Vengin Sawmsang hmangin hma an hruai a, goal khung belh tawh lo mah se first half an thunun.

Coach BS-a'n player an rem fuh tawk lo tih a hria a, second half ṭan chiahah Malsawmfela, Lalbiakhlua leh B. Zoramthanga te a luhtir. B. Sena hi defence laiah awmin Lalrinzuala chu right back-ah a insawn phei a, Biaktea awmna tur a chiang - ding lam sirah a awm nghal chat. Chutiang bawkin Sawmfela'n no. 9 hna a chelh a, F. Lallawmkima'n no. 10 hna a chelh thung.

Sawmfela tan Lawma a tlan hnem a, veteran striker Sawmfela rilru a fim thung. Sawmfela'n ball a chan hmasak berah ṭha taka lalutin keeper Simon Lalṭhazuala Hmar tan hna a siamsak nghal. Electric Veng an fimkhur phah lo a, an tisual. EFC midfielder ball chan rei vangin ball a ti per a, Sawmfela zawnah a kher a tla - ani hian Fakzuala tan a pein Police captain-in minute 51-naah chiang zetin a pet goal.

Police an phur tawh a, Electric Veng an zam. Sawmfela ball khawih apiang a hlauhawm ta emaw tih tur a ni a, Biaktea vanneih ṭum ni se hattrick hial siam thei a ni ang, mahse goal hmaah a vannei tlat lo. Chutihrualin Biaktea erawh goal hnih luhna kawnga a pawimawh a, dinglam aṭanga a cross chu box pawn aṭangin defender Ruatpuia'n chakna goal khung nan a hmang. Goal luh hnuah minute 25 an la khel leh a, EFC-in siphurh sutna hun an nei lo - goal khung belh thei dinhmunah Police an ding zawk.

Police hi table-ah pathumnaah awm chhunzawm mah se point thum hlu tak an hlawhchhuah avangin pakhatna Chanmari nen an inkarah point thum chauh a awm tawh. BS-a Colney hoten semifinal lut turin kawng dik an zawh a, chutihrualin an dinhmun erawh a la him lo.