Kan tan inzirna a ni - Southgate

England chuan Euro qualifier-a an match hnuhnung berah North Macedonia chu 1-1 in an inhnehtawkpui hram a, khualmuala an result hi result duhthusam ni lo mah se Euro 2024 khel tura an tlin chian tawh tho avangin England manager Gareth Southgate chuan an tan inzirna a nih thu a sawi.

North Macedonia tan captain Enis Bardhi chuan minute 41-naah goal hmahruai a khung a, a penalty pet Jordan Pickford-a'n a dan, a let lehlam chu goal-ah a chantir. Three Lions hian minute 59-naah si phurh an sut hram a, Phil Foden-a corner aṭanga ball kal chu Jani Atanasov chuan an lamah a tilut.

Mahse, awlsam taka hnehna an channa tur hmuna ngaihah England-in goal an khung zui lo a, uanpui tham result a ni lo. Heti chung hian Southgate erawhin zir tur an hawn thu a sawi a, an result-ah a lawm.

England hian Zirtawpni zan khan Malta chu 2-0 in an hneh bawk a, mahse, he inkhelah pawh hian an khel ṭha tawk lo. Three Lions boss Southgate chuan, "Kan match hnuhnung pahnihah player ṭhenkhat enchhinna hun kan hmang thei a, hnehna chan tum chunga chutiang kan tih theih avang chuan a lawmawm hle a ni.

"A tlangpui thuin player enchhin tur hi chuan March nghah thlente a ngai ṭhin a, tun ṭumah erawh hma takah kan ti thei. Heng match hnih aṭangte hian thil tam tak kan zir a, kan tan chuan thil lawmawm tak a ni," a ti.

Three Lions tan hian Manchester City rawlthar duhawm Rico Lewis chuan international football-a a match hmasa ber a khel a, an goal chhuah chu a penalty chawi kal zel aṭanga lut ni mah se, a khel ṭha takzet - a chance neih vawi khat bar chungah a thlawh a, Macedonian keeper Stole Dimitrievski chuan ṭha zetin a dansak bawk.

Southgate chuan, "Lewis khan a khel ṭha takzet. Chep tak kara ball a dawng theite kha player ṭha bik danglamna a ni a, ball a keng ngam a, a tihsual ni miah lo avanga penalty a chawi chunga a inher rem leh theite kha pui tak a ni," a ti a, a player a fak hle.

Bench aṭanga Harry Kane luhtir a nih hmain England tan Kyle Walker chuan captain armband a hreng a, Manchester City defender hi England tana captain ni thei 126-na a ni.