President's Cup 2023: Vawiinah a hmawr an bawk dawn ta

Cricket Association of Mizoram (CAM) hnuaia inelna - President's Cup 2023 chu vawiin chawhma dar 11:00 hian final khelh a ni dawn. Ṭhuampui Chinari leh Kulikawn ten nomawi an inchuh ang.

Suaka Cricket Ground, Sihhmuiah nimin khan semifinal khelh zawh niin, inkhel hmasa zawk chu ruah sur vangin a hun pangngaiah ṭan theih a ni lo. Over 20 khelh tur chu over 10-ah tihhniam a ni a, Ṭhuampui Chinari chuan Chhinga Veng chu wicket riatin an hneh.

Ṭhuampui tan run 30 siamtu Abhay Joshi leh thi loa run 21 siamtu Gaurav Singh te an che ṭha, anni pahnih hi vawiinah pawh Kulikawn laka an innghahna an ni leh thei ang - man of the match atana thlan Sumit Lama a pawimawh dawn bawk, ani hian over hnih chauh a vawm aṭangin wicket thum a la thei.

Semifinal hnuhnung zawk erawh over 20 khelh theih niin, team ṭha Kulikawn chuan Venghnuai Raiders chu run 24-in an hneh ve thung. Kulikawn tan Sahil Reza a pawimawh, ani hian Venghnuai lakah run run 23 a siam bakah wicket thum a la bawk a, vawiinah pawh Ṭhuampui tana fimkhur ngaihna tur lai a ni ang.

President's Cup hi T20 format hmanga khelh a ni. 1st division club pariat bakah 2nd leh 3rd division, non league club leh Aizawl pawn district dang aṭangin team an inlan a ni.