Euro 2024 khel tur Italy

2024 UEFA European Football Championship khel turin champion lai Italy an inpetkai ve leh ta a, Azzurri hian Ukraine lakah goal khung lo mah se 0-0 in an inhnehtawk a, tlang tura draw result a tawk avangin an tlang.

Italy leh Ukraine hi point hmuh zat inangin Thawhṭanni zanah an intawng a, Ukraine tan chak ngei ngei a ngaih laiin, an intawn hmasaka 2-1 a chak zawk Italy tan erawh draw result a tawk.

Azzurri-in an mamawh result an hlawh chhuak a, group C hmahruaitu England hnung zuiin Germany-a zinna tur ticket an la fel ta - chutihrual chuan European champion hian an group stage match tawp thlengin hlauhthawngin an khel a, nomawi humhim an tum chuan insiamṭhat an mamawh.

Group C inkhel dangah England an chak zo bik lo a, Three Lions hian North Macedonia chu khualmualah 1-1 in an inhnehtawkpui - England hian match riat an khelh aṭangin tlawm an nei miah lo a, Euro 2024 khel turin an tling chiang hle.

Ukraine an ṭang

Ramchhung buaina avangin Ukraine-in mahni ramah match an khel thei lo a, Thawhṭanni zan inkhelah pawh hian Italy hi Leverkusen, Germany-ah an mikhual a, mahni muala an inkhel thei lo chungin thlawptu erawh an nei ṭha.

Ukraine tan hian Heorhiy Sudakov chuan chance duhawm nei mah se, Italy goalkeeper ṭha mi Gianluigi Donnarumma chuan a dansak a, Italy tana Nicolo Barella hun neih chu Ukraine keeper Anatoliy Trubin chuan a dansak ve bawk.

Azzurri an insiamṭha hret hret a, mahse, Benfica keeper Trubin khelh ṭhat zan an tawng a, goal an khung thei bik lo. Ukraine tan Chelsea forward Mykhailo Mudryk chuan hun tawp lamah penalty a beisei a, Italy ṭantute thin a phu dup dup.

Mahse, Bryan Cristante-a tihtluk Mudryk hian penalty a hlawh chhuak zo lo a, Italy an vannei takzet - hun tawp thlengin goal dang a lut lo a, Italy-in Ukraine nena point inang chungin Euro 2024 an inpet kai.

A harsa

Ukraine-in Italy point hmuh ang zat hmu mahse, qualifier aṭang chuan Euro 2024 an inpetkai zo ta lo - mahse, Nations League kaltlangin playoff khelh theihna dan an la nei a, an vannei takzet.

Ukraine boss Serhiy Rebrov chuan, "Inhriat vek angin Ukraine-ah chuan indona a la awm reng a, kan player-te tan pawh a harsa. Keimah ang thoin an phone an en reng a, chanchinthar an thlir reng a, hetiang ang boruak kara hnathawh chu harsa tak a ni.

"Mahse, ram pakhat, sawi nghin mai mai theih loh angin kan ding chhuak a, khelmualah khan ka player-te khan an theihna zawng zawng hlanin, he ram tan hian an bei a ni," a ti a, tling zo ta lo mah se, a vui lo.

Ukraine-in head-to-head vang chauhin Euro 2024 chu direct-in an khel dawn lo a, mahse, Nations League kaltlanga playoff an la khelh dawn avangin Germany pan theih dan an la nei.

Italy an lawm

Kum 64 mi Luciano Spalletti-a'n thla thum liam ta lawk aṭang khan Italy enkawl hna a thawk ṭan a, match ruk a kaihhruaiah vawi khat chiah tlawmin, vawi thum a chakpui a, vawi hnih draw result a neihpui - tunah chuan Euro a hruai thleng ta.

Season hmasa lawka Serie A lama Napoli champion puitu Luciano Spalletti chuan, "Kan tih ṭhat em avangin kan hnathawha lawm tur kan ni. Tunah chuan a sang zawk kan beisei dawn a, a nuam chho tak tak dawn e," a ti!

Italy hian Euro 2020 nomawi an chawi a, mahse, Roberto Mancini kaihhruaina hnuaia team hmuhnawm hian World Cup 2022 an khel phak lo. Mancini hi August thla khan a bang zui a, a hmun ruakah Spalletti lakluh a ni.

Italian coach Spalletti hian an ram club langsar AS Roma leh Inter Milan pawh a lo enkawl tawh a, season hmasaa league-a Napoli a champion pui kha a hnathawh ropui langsar a ni - Italy tan ropui zawka hna a thawh zel an beisei ang.