Project Vengin Chanmari an chelh

Toyota MPL10 hmahruaitu Chanmari FC chu nimin khan kaithar Project Veng FC nen 1-1 in an inhnehtawk a, hun tawp hnaihah phei chuan Kolasib club hi an chungnung zawk an ni hial.

1st Bn MAP Ground-a inkhelah Chanmari tan Lalrammuanpuia'n hmahruaina goal a khung a, goal dang khung belhna remchang ngah mah se hun ṭha an bawhpelh. Second half-ah Project Veng an khel ṭha a, Jehova Lalthangsanga goal mawi bik hmangin point khat hlu tak an hlawh chhuak.

Target Aizawl FC

Chanmari FC squad a ṭha a, player siksawina tur an ngah. Chutihrualin niminah erawh CFC-in starting eleven an thlak hlawk a tih theih a, rinrawl zinga inlan chu keeper Zothanmawia (T. Mawia), Thanglalven Gangte leh R. Laldanmawia te chauh an ni.

K. Malsawmkima hoten player ṭhahnem tak an dah ṭhat hi November 24, Zirtawpnia Aizawl FC nen an inkhelh dawn vangah a ngaih theih. Chanmari thutlukna a huaisen a, an ruahmanna vang hian I League club nena an inkhel tur en a châkawm sawt.

CFC nge nge

Chanmari FC lamin an team ṭha ber an luhtir lo chungin inkhel an thunun tho a, goal chance pawh an ngah zawk. Midfield-ah John Lalrempuia Sailo-in a hun ṭha neih a hmang ṭangkai a, defence laiah Lalmawizuala a rintlak viau bawk.

Team pahnih danglamna tak erawh captain Danmawia a ni a, Sialhawk Express ball cross tawk zet chu Apuia'n minute 25-naah a pet goal. Armed Veng South aṭanga Durtlanga insawn tawh Apuia hian goal khung thei bik player a nih tih a lantir a, coach Mala pawhin a theihna hi a hmuh hmaih a rinawm loh.

Danmawia ball pek ṭha ṭhin mah se Chanmariin goal dang an khung belh lo a, John-a'n a goal khung tur keeper Malsawmtluanga'n a dansak leh goal pawn chiaha a tauh chhuahte chu a ui khawp ang. Chutihrualin first half chungchanga Project Veng assistant coach Lalruatfela thlirna a dang.

Ruatfela chuan, "Chanmari kha kan beisei aiin an ṭha lo a, inkhel thunun tira counter attack hmanga nawr kan tum. Mahse, an player luhtirte khan min barakhaih a, kan beisei aia tam ball kan chan tam avangin kan buai. Kan game plan-ah kan lut thei lo," tiin Vanglaini a hrilh thung.

Goal mawi bik chu

Football-ah game plan a pawimawh tih chu tlang hriat a ni a, second half-ah Kolasib club-in ruahmanna an rawn nei ṭha ta zawk. Chanmariin first half an khel ṭha nachungin halftime-ah Laltlanzova, Lalthangliana leh Lalpianthanga te an luhtir.

Kolasib club pawhin Jack Lianlalmawi Neihsial leh Samson Haubiakmuan te an luhtir ve nghal a, danglamna rawn siamtu tak erawh minute 67-naa lut Andy Lalrinpuia a ni thung. Second half-ah Chanmariin midfield an thunun thei tawh lo a, Kolasib club zawk an chungnung ṭhawt.

Project Vengin set piece an hmang ṭangkai a, Chanmariin keeper T. Mawia nei lo phei se chuan an buai khawp ang. T. Mawia'n a theihna sang tak hmangin pressure a la kiang. Mahse, Project Vengin an thawhrim rah an seng a, minute 73-naah vei lam substitute Andy-a cross chu scissor kick hmangin Jehova'n a a pet goal.

Chanmari an hawi hai a, Project Veng an phur sawt. Coach Mala'n Lalkhawpuimawia leh Vincent Lalduhawma te luhtir mah se Chanmariin awmze neiin an khel thei tawh lo a, chutihrualin subsitute Zozoa'n keeper Mala chauh a hmachhawn hnuah a khung lo.

Chanmariin substitution an hman zawh hnuah Lalrosanga Hrahsel inhliamin player 10-in an khel a, Rosanga luh leh hnuah Thanglalven Gante inhliam lehin player 10-in an khel tluan. A tawpa vannei zawk chu Chanmari an ni ta zawk a, Project Veng nen 1-1 in an inhnehtawk.