Djokovic-a'n a la duhtawk mai lo!

Grand Slam champion hnem ber a ni a, world number 1 ni rei ber niin ATP Finals champion hnem ber a ni bawk, mahse Novak Djokovic chuan a la duhtawk mai lo. Davis Cup leh Paris Olympic champion nih tumin a bei dawn.

Kum 36 mi Djokovic hi chawlhkar 400 chhung number 1 a ni thei ta a, kumin chu a chung bera awm chungin season a khar dawn. World number 1 ni chunga kum tawp a hman zat ringawt pawh vawi riat a tling dawn ta a ni.

Serbian star Novak chuan, "Engtik lai pawh hian thil tum mumal leh ṭha tak ka nei ziah a, kum tharah pawh chu chu a danglam lo ang. Inelna lian Grand Slam plaite hi ka ngaih pawimawh an ni leh dawn.

"Major tournament chauh a ni dawn lo, kum tharah chuan Olympic Games a awm dawn avangin a pawimawh hle bawk," a ti. Olympic gold medal tak hi a la lak ngai loh a nih avangin a ngaipawimawh a nih pawhin a mak lo ang.

Olympic hi July 26 aṭanga August 11 chhungin France khawpui Paris-ah neih a ni dawn. French Open leh Wimbledon inkar chep takah khelh a nih dawn avangin a hautak dawn a, inelna lian inkarah hahchawlhna hun a awm dawn lo tihna a ni.

Djokovic hi ram a hmangaih avanga fak hlawh a ni ṭhin a, kum tharah pawh hian mimal hmingṭhatna mai piah lamah Serbia tana Olympic medal lak tuma a beih ngei pawh a rinawm, kuminah pawh Serbia tan Davis Cup khelh a la tum.

Serbian tlangval chuan, "Ka tan season a la zo ve lo. Serbia tan Davis Cup lak ka duh, keimah chauh ni loin kan ram tan chawlhkar pawimawh tak a ni dawn. Theihtawp kan chhuah dawn a ni," tiin a sawi.

US Open nomawi a chawi hnu pawhin mimal tournament a khel mai lo a, an ram tan Davis Cup hi a lo khelh chhunzawm tawh zawk. Tun ṭumah hian Serbia hian quarterfinal-ah Great Britain an hmachhawn ang.

Canada, Finland, Czech Republic, Austrlia, Italy leh Netherlands te pawhin quarterfinal an lut a, a chak lo apiang an tlak nghal tawh dawn avangin champion tum tan chuan chetsual a rem tawh lo.