Fiorentina fapa rangkachak Batigol

World Cup 1994, 1998 leh 2002 entu MHIP lamin an ṭan rawn ṭhin pakhat a awm - a hming chu Gabriel Omar Batistuta a ni a, a hunlai khan Mizo nu ho - ni lo, nula pawh telh an ngai! Chung ho chuan Argentina an ṭan phah em em ṭhin a nih kha. 

Chu tlangval chuan a dar vaw phak mawi tawk velin a sam a zuah a, a mitmeng pawl ram maite chu nula tan chuan tuar har tak a ni. 1994 vela naupang, chhungpui nu berin Batistuta a atchilh avanga Argentina ṭan zui zel ta eng zat tak awm ang che u maw?

"In inah TV kan lo en, kan vawih miah lo ang," tia Mizo naupang tam zawkin mi sitting room chhuat hawha TV an en lai khan Argentine striker hian an ram tan mai ni lo Fiorentina tan a hming a lo chher daih tawh a, Florence khawpuiah chuan 'Lal' ang mai a ni. 

Mahse, he pa chanchinah hian vawiin thlenga ngaihnawm ti taka an sawi ṭhin pakhat a awm a, chu thawnthu chuan vawiin thlengin Fiorentina ngainatute mittui a ko chhuak ṭhin - Roma tana Fiorentina lama goal a khung ṭum kha!

Florence khawpuia kum kua zet hun a hman hnuah Batistuta chuan ropui lehzual beiseiin AS Roma a pan a, November 26, 2000-ah khan a nuna tawn tura a duh ngai reng reng loh thil a tawn a ngai thung. 

Fabio Capello hnuaia Serie A nomawi chawi beisei Roma-in Fiorentina an mikhual a, league champion nih an duh chuan an chak a ngai. Inkhelh hmain Batistuta hian Viola (Fiorentina sawina) fan-te lam hawiin zahna chibai a buk a, Fiorentina a la ngai reng a, fan-ten an la lawm reng bawk. 

He inkhelah hian Fiorentina coach Fatih Terim chuan Roma tlarhmaa Batistuta leh Francesco Totti inkawp dang chat turin 4-5-1 formation a hmang a, Capello-a hman thiam em em 3-4-1-2 chu hun rei tak a dang chat. 

Mahse, minute 83-na a ni a, Roma fan-ten point khatah an lungawi a ṭul mai tawh dawn nia an ngaih laiin Batistuta a lo lang. Argentine striker hian player class bik a nihzia pholangin ropui zetin a volley a, Fiorentina goalkeeper Francesco Toldo chu boruakah a invawrh sang thlawn. 

Stadio Olimpico khelmuala Roma fans 60,000 chuang pungkhawm thawm chu ring tak a ni. Khelmual sira coach rorum lo ding reng Capello meuh pawh insum zo loin a sapatal a, coaching staff dangte pawhin awmdan mawi an ngaihtuah hman lo. 

Mahse, chu khelmualah chuan tlangval pakhat erawh ngawi rengin a awm a, a ṭhianten an kuah luih luih chung leh a biang thlenga an fawp chungin a maimitchhing tlat a, a mittui dan let a tum tih hrilh nawn kan ngai lo - chu tlangval chu Batistuta a ni. 

Halfway line lam panin Batistuta a phei hnak hnak a, a hawi chhuak ngam lo. A team tana a hnathawh tur chu goal khung a ni a, amah siam liantu leh a hmangaih em em Fiorentina pawh ni se a hna chu goal khung a ni. 

Chu hna chu tlin takin a thawk a, mahse a thinlung erawh a na em em si. The Guardian chanchinbua sports writer Sean Ingle chuan, "Batistuta chuan Fiorentina mai ni loin, ama thinlung ngei pawh a ti keh chhe ta vek a ni," tiin he inkhela Argentine striker goal khung chungchang a sawi. 

Roma-in point thum hlu tak an hlawhchhuak a, champion an beiseina an chhi nung chhunzawm zel. Batistuta erawh inkhelh zawh thlengin a awm a nuam thei lo a, Fiorentina fan-ten an ngaihdam leh dam loh chu a rilru mawlhtu ber a ni. 

Batistuta hian inkhelh zawha media mi te a hmachhawnnaah a goal khung chuan a tih nat thu zep loin a sawi a, Viola fan-te ngaihdamna a ngen bawk. Goal a khung theih em avanga Batigol tih hminglem an pek chuan, "Point thum hlu tak kan neih avangin ka lawm a, mahse Fiorentina-a ka hun hman zawng zawng ngaihtuah letin ka lawm erawh a kim thei lo a ni. 

"Florence-ah hian ka fate an seilian a, anmahni vanga vawiin hun hi thleng ka ni. Theihnghilh an harsa em em. Mahse, Viola fan-ten min hriatthiam hram ka beisei a, ka theih ang tawkin an chungah ka zahna ka lantir a ni. 

"Ka inkhelhpui ṭhinte lama goal khung kha nuam ka ti lo a, mahse Roma-in hnehna chan ngei an duh si a ni. Fiorentina hremtu nih ka duh ngai lo a, mahse kan duh loh pawh kan tih a ngaih chang a awm ṭhin. Kha game kha khelh loh tawp tur a ni," a ti!

Batistuta hian kum 1991 khan Boca Juniors aṭangin Fiorentina hi a pan a, a season hmasa berah match 30 khelin goal 14 a khung nghal. Mahse, he season-ah hian Fiorentina hi an relegate a, fan-te hlauhthawn ber chu Batigol chan a ni. 

Hetihlaia an vanglai hun hmang AC Milan leh Real Madrid-ten Batistuta beisei mah se Serie B khelh a thlang a, hei tak hi Viola fan-ten Batigol an ngainat zualna a ni. Serie B-ah season khat hmangin match 35-ah goal 19 a khung a, Serie A lamah an kir lehnghal. 

Florence khawpui chuan Batigol hi an fapa a ni tih an pawm thlap a, a pawi ber erawh goal khung a ṭhulh lo chunga Fiorentina-in a beisei ang result an pe thei lo kha a ni - kum 2000 thleng a cham chhungin inelna hrang hrangah match 331 khelhsakin goal 203 a khung. 

Batigol hian 1995-96 season khan Florence club tan Coppa Italia match riatah goal riat khungin nomawi a chawipui a, mahse hei hi Florence khawpuia nomawi lian tham a chawi awmchhun a ni. 

Ángel Gabriel tia hminglem an pek hi Fiorentina-a a cham rei luatah a ropui tur anga ropui tawk loah ngaih a ni hial a, Manchester United, Milan leh Real sawmnate kha hnar lo se chuan nomawi tam zawk a chawi ang tih chu thil chiang a ni. 

Kum 2000 khan Batigol hi AS Roma-in an sawm a, hetihlai hian kum 30 a tling tawh. A hun tawp a hnai tawh tih Argentine striker hian a hai lo a, Florence-a a cham reng chuan nomawi aiin hmangaihna chanchin chu chaw tui zawka neih a ngai dawn tih a hria. 

Thutlukna harsa siamin euro maktaduai 36.2-in Roma a pan a, a hun lai hian kum 30 chung lam player zinga manto ber a ni. Roma tan hian inelna hrang hranga match 32 khelin goal 21 a khung a, Serie A nomawi a chawi nghal. 

Roma tan season khat leh a chanve dang a khelh hnuah Inter Milan leh Qatari club Al-Arabi te a zawm a, Qatari club-a a season hmasa berah match 20 khela goal 26 khungin Qatari football season-a goal khung hnem ber record a la siam cheu - kum 2005-ah inkhelh a chawlhsan thu a puang a, Angel Gabriel chuan khelmual khawvel a mangṭha.

Hming    Gabriel Omar Batistuta

Pianni leh thla    1 February 1969 (kum 51)

Pianna Hmun    Avellaneda, Santa Fe, 

    Argentina

San Zawng    1.88 m (6 ft 2 in)

Playing position    Striker

Hlawhtlinna langsar

River Plate

Argentine Primera División: 1989–90

Boca Juniors

Torneo Clausura: 1991

Fiorentina

Serie B: 1993–94

Coppa Italia: 1995–96

Supercoppa Italiana: 1996

AS Roma

Serie A: 2000–01

Supercoppa Italiana: 2001

International

Argentina

Copa América: 1991, 1993

FIFA Confederations Cup: 1992

Artemio Franchi Trophy: 1993

Mimal Chawimawina Langsar

Copa América top scorer: 1991, 1995

FIFA Confederations Cup top scorer: 1992

Serie A top scorer: 1994–95

Coppa Italia Top Scorer: 1995–96

FIFA XI: 1997, 1998

FIFA World Cup Silver Shoe: 1998

Argentine Player of the Year: 1998

ESM Team of the Year: 1998–1999

Serie A Foreign Footballer of the Year: 1999

FIFA World Player of the Year: Bronze Award 1999

Qatari League top Scorer: 2004

Ballon d'Or: 1998 (6th place), 1999 (4th place), 2000 (7th place)

FIFA 100

Italian Football Hall of Fame: 2013

A.S. Roma Hall of Fame: 2015

AFA Team of All Time (published 2015)

Fiorentina Hall of Fame

Fiorentina All-time XI

Fiorentina All-time top scorer in Serie A

•    World Cup 1994-ah an match hmasa berah Greece hmachhawnin 4-0 in an sawp a, hattrick a siam. 

•    World Cup 1998-ah Jamaica lakah hattrick 

a siam. 

•    World Cup pahnihna hattrick siam thei awmchhun a ni. 

Argentina khaw pakhat Avellaneda-a naupang, sa talhtu fapa football zinkawng hi a awlsam bik lo. Player khan sang tak a nih avangin a tirah chuan football aiin basketball khelh chu nuam a ti zawk a, FIFA World Cup 1978 khan engkim a rawn thlak danglam ta thung. 

World Cup '78 hi Argentina hian an thleng a, an champion bawk - he inelnaa Argentine striker Mario Kempes che vel chuan Batistuta a hneh a, basketball mangṭhain football boot a bun ṭan. 

Kawngpui dunga inkhelin bul a ṭan a, a hnuah an khaw club Platense junior team a zawm. An khaw chhehvel inelnaah final an lut a, an ram club lar Newell's Old Boys chu an hneh. Hei hi Batistuta tana kawngkhar hawngtu a ni. 

Newell's boss Marcelo Bielsa chuan he inkhela an lama goal hnih khungtu Batistuta hi a team-ah a lalut a, a hawi kir tawh lo - a tir lamah erawh harsa a ti ve ṭhin hle. 

Stadium-a room pakhatah awmna pek a ni a, hrehawm a tih ber chu lunglen a ni - kum 16 mi a nihlaia a tawn a bialnu Irina Fernández, a nu leh pa leh a farnu pathumte ngai reng rengin hun a hmang ṭhin. 

Newell's-ah hian beisei phak loin club tenau Deportivo Italiano-ah loan-a kal tir a ni a, kum 1991-a Fiorentina a pan hmain Newell's, River Plate leh Boca Juniors-ah season khat ṭheuh a khel hman. 

A club hmasa berah beisei a phak loh hnuah River Plate-ah hmun a chang phak lo leh a, a naupan laia a club ṭan ṭhin Boca a pan - season tluana match 42 khelin goal 19 a khung a,  a theihna tak tak a pholang ṭan. 

Copa América 1991-ah Argentina tan a inlan zui a, goal ruk khungin top scorer a ni - hetihlaia Fiorentina vice president Vittorio Cecchi Gori chuan Batigol theihna san bikzia hmuin a club zawm turin a sawm a, a bak zawng chu thawnthu ngaihnawm an chang ta. 

Batigol hian Argentina tan match 77 khelin goal 54 a khung hman a, Copa America-ah vawi hnih a champion pui. World Cup-ah erawh beisei angin Argentina a thlenpui thei lo. 

World Cup 94-ah last 16 bak an thleng zo lo a, 1998 quarterfinal-ah Netherlands ngam loin an tla a, kum 2002-ah phei chuan group stage an paltlang zo lo.

Nigeria an hneh hnuah England ngam loin Sweden an inhnehtawkpui a, Batistuta hian mittui nen a international career a mangṭha zui.