Miguel Oliveira a chawl rei dawn

MotoGP rider Miguel Oliveira chu Qatar Grand Prix-a Sprint Race lama a chetsual avangin kuminah a intlansiak thei dawn tawh lo a, nakkumah pawh February thla hma chuan a intlansiak leh theih a rinawm tawh loh a ni.

Aprilia chuan an rider hi a dar (koki) a hliam tih an sawi a, tun season intlansiak hnuhnung ber tur Valancian GP-ah a tel dawn lo tih an sawi bawk. Tuna a hliam ang chiah hian kumin khan Enea Bastianini a lo hliam tawh a, thla hnih aia rei deuh a chawlh a ngai a ni.

Pathianni zana tlan zawh tak Qatar GP-ah khan Fabio di Giannantonio chu pakhatna a ni a, rider championship lama hmahruaitu Francesco Bagnaia chu pahnihnaah thlengin hmabak pakhat chauh an neih tawhah a dinhmun a ṭha ta hle.

Bagnaia elpui ber Jorge Martin chuan an inkar tihzim tum viau mah se 10-naah a thleng hram a, a chunga awm a phak lohna chu point 21 lai a ni ta. Intlansiaka hnehna changtu hian point 25 an hmu ṭhin, a tan Bagnaia lehpelh a harsa tawh ang.

Kum 26 mi Bagnaia hian Valencia Grand Prix an tlan ṭan hma, Inrinnia tlan tur Sprint Race-ah hnehna a chang a nih chuan a zawnin MotoGP title a la fel thei der dawn tihna a ni a, a tan chuan chetsual loh ngawr ngawr a pawimawh dawn.

Ducati rider Bagnaia chuan, "Hnehna chan tum viau mah ila Digi khan a tlan ṭha em a, ka tan chuan chak a harsa. Intlansiak ṭhenkhatah hi chuan hnehna changtu ni kher lo pawha kan lawm a ngaih chang a awm, infiamnain a ken tel a ni," a ti.

November 26, Pathianni zan dar 7:30 hian Circuit Ricardo Tormo-ah Valencian Grand Prix an tlan dawn, tun season chhunga intlansiak hnuhnung ber a nih dawn bakah rider champion a hriat dawn a, bike intlansiak ngainatute tan chuan kar tawp hlimawm tak a ni ngei ang.