Germany-ah Czech Republic an kal dawn

Euro 2024 qualifier-a an match hnuhnung berah Czech Republic chuan 3-0 in Moldova an hneh a, Germany-a Euro khel turin an inpetkai - group E aṭang hian Albania chu an lo inpetkai tawh bawk a, Robert Lewandowski neitu Poland erawh pathumna an nih avangin Nations League kal tlanga playoff khelh tur chu an beiseina a ni.

Czech tan hian David Doudera chuan goal hmahruai khungin, goal dang a lut lo reng a, mahse, minute 55-naah Moldova defender Vladislav Baboglo chu a yellow card pahnihna avanga hnawhchhuah niin, Czech tan zau zawka kawngkhar hawnin a awm.

Player tam zawk nia an khelh hnuah Czech tan Tomas Chory leh Tomas Soucek te chuan goal khat ve ve an khung ve leh a, hun tawp thlenga goal dang lut tawh loin, 3-0 in Czech Republic an chak.

Euro 2024 khel turin Jaroslav Silhavy-a'n Czech a tlinpui a, mahse, Germany-ah Czech coach hian an ram team kaihhruai a tum lo - a ban thu a puang zui a, a hnain a ken tel 'pressure' chu a ban chhan a nih thu a sawi.

Kum 62 mi coach chuan, "Tunah chuan hlim viau mah ila, kan inkhelh hma khan he hna bansan tur hian thutlukna ka siam fel tawh a ni.

"Czech FA president Petr Fouska bulah pawh ka sawi tawh a, a pressure hi a sang lutuk a, a chang chuan kei ngei pawhin ka hrethiam ṭhin lo. Chuvanga he hna hi bansan pawh ka ni pakhat," a ti a, hahdam taka hun hman a duh.

Slavia Prague boss hlui Silhavy hian September 2018 aṭangin Czech Republic hi a enkawl ṭan a, Euro 2020-ah quarterfinal hruai thleng mah se, World Cup 2022 an khel lo a, tunah Euro 2024 hruai thleng lehin, a bang ta thung.