A tawpah chuan a changtupa!

Kum 2000 hnua a vawi khat nan Slovenia chuan European Championship an khel dawn a, World Cup 2010 hnua major tournament an khelh leh tur hmasa ber a ni nghal bawk - Thawhṭanni zan khan an mikhual Kazakhstan chu 2-1 in an hneh.

Team pahnih intawn hmain Slovenia tan tlang turin draw result a tawk a, Kazakhstan-in an ram chanchina a vawi khat nana tling turin chak an mamawh bawk - minute 90-in team pahnih hmaa a chhawp hi a lian tham hle.

Minute 41-naah Slovenia an vannei nghal a, Yan Vorogovskiy-a'n Petar Stojanovic lakah penalty a chawi a, video assistant referee hmanga nemngheh a ni - Benjamin Sesko chuan penalty hi goal-ah a chantir.

Mahse, Kazakhstan an beidawng duh bik lo - Ramazan Orazov chuan second half ṭan aṭanga minute thumna lekah si phurh a sut a, beiseina an nei thar. Chance hlauhawm nei leh hmasa zawk erawh Slovenia bawk an ni a, Jaka Bijol-a shot goal ngei tur nia lang chu Islambek Kuat chuan goal line aṭangin a lo dang!

Hun tawp nan minute li chiah a awm tawh a, Slovenia an vannei ta nge nge - Benjamin Verbic chuan goal a rawn khung a, Kazakhstan tan si phurh sut turin hun a tam tawk tawh lo.

Euro 2024 khel turin Slovenia an tling a, Kazakhstan erawh Nations League kaltlanga playoff an khelh tur chu an nghah rih mai a ngai. Group H aṭang hian Denmark chu hmahruaitu niin an tling a, Slovenia nen an point hmuh zat inang mah se head-to-head a an ṭhat zawk avangin group hmahruaitu an ni.