Curry hoin GSW an chak

Golden State Warriors tan hun pawimawhah Stephen Curry leh Klay Thompson te an rawn dingchhuak a, nimin zing NBA regular season inkhelah Warriors hian Houston Rockets chu 121-116 in an hneh.

San Francisco-a inkhelah Curry chuan point 32 neiin a thawh hnem leh ber a, a ṭhianpa leh hlawhtlinna tam tak a lo chanpui tawh ni bawk Thompson chuan point 20 nei bawkin an chakna hnar an ni.

Warriors hian hrem vangin Draymon Green an la chhawr thei lo, match nga chhung atan hrem a ni. Green-a tel lo chuan result ṭha neih a harsa ṭhin - Rockets player hlui Chris Paul chuan point 15 neiin a thlawhhlawk hle bawk.

GSW hian season bul an ṭan fuh lo, match sarih an chakna chiah niin vawi riat an tlawm tawh thung. Western Conference table-ah 10-na an ni mek a, an dinhmun ṭha lo chawi kang tura beih an tum ang - Ningani zingah Phoenix Suns nen an inkhel leh ang.

Inkhel dangah Denver Nuggets tan Most Valuable Player (MVP) vawi hnih ni tawh Nikola Jokic chu hnawhchhuah a ni a, an player pawimawh hi hrem ni mah se coach Michael Malone leh a naute hian Detroit Pistons chu 107-103 in an hneh.

San Antonio Spurs erawh an boruak a fuh thei rih lo - tun hnaiah a zawnin match kua ngawt an tlawm ta! Spurs hian an khingpui Los Angeles Clippers chu 124-99 in an ngam lo. Miami Heat erawhin Bam Adebayo (23 points) leh Duncan Robinson (22) te hmangin Chicago Bulls chu 118-100 in an hneh thung.

Basketball inelna sang berah hian nimin zing khan - New Orleans Pelicans leh Minnesota Timberwolves te pawh an chak a, hetih lai hian Boston Celtics erawh Charlotte Hornets lakah 121-118 in an chak lo.

Celtics tan Jayson Tatum-a'n point 45 tehmeuh a neiin a thawhhlawk hle a, team pahnih an inkhel tawk hle thung. Hun tawp hma chiah, second ruk chauh a awm tawh tihah Miles Bridges chuan 3-points vawm lutin Hornets a chakpui a ni.