Second round-ah Satwik leh Chirag

India tlangval badminton khel thiam pahnih - Satwiksairaj Rankireddy leh Chirag Shetty te ṭangdun chuan Ben Lane leh Sean Vendy te inkawp an hneh a, harsa lutuk loin China Masters khelh laiah second round an lut.

Nimin inkhelah Satwik-Chirag te hian English pair hneh turin minute 37 chauh hun an hmang, game hloh loin 21-13, 21-10 in an chak. Anni pahnih hi doubles huangah chuan India innghahna leh medal lak theihna an ni mek zel.

Singles inelna lamah HS Prannoy leh Lakshya Sen te pawh an inlan dawn. Tournament hi Paris Olympic atana qualifier zinga mi a ni a, chuvangin nomawi bakah ranking point hmuh belh theih a pawimawh hle.

Paris Olympic 2024 atan hian nakkum April 28 thlenga an ranking point en tur a ni dawn a, a sang zual 16 te chu infiamna khawmpui lian berah hian an tel thei dawn a ni.