Vawiinah Serie A ṭan hun hriat dawn?

Italy sports minister Vincenzo Spadafora kaihhruaina hnuaiah vawiin hian Italian football khelh ṭan leh theih hun tur an sawiho dawn a, thla thum deuh thaw hnuah an inkhelh chhunzawm leh theih beisei a ni.

Covid-19 vangin March 9 aṭang khan Serie A chu chawlh lailawk a ni. Italy ramah hri kai leh thihpui an tam, nimin tlai thleng khan mi 33,000 chuang an thi tawh. Harsatna nasa tak karah league hi khelh chhunzawm ngei an la tum ruh hle.

Sorkar thuneitu lam aṭangin phalna an hmu a, Italian football federation chuan league khelh zawh hun atan August 20 an ti chiang tawh. An beisei dan chuan June 13 vel aṭangin inkhelh leh theih an inring.

Serie A club tam zawkin league khelh chhunzawm an duh a, hun rei deuh tak chhung mimal training an neih hnuah May 19 aṭang khan team training pawh an nei leh tawh, inkhel turin club tam zawk chu an inpeih leh thawkhat tawh hle.

League bakah Italian Cup chu semifinal aṭangin khelh chhunzawm a la ngai dawn a, Italian champion Juventus chu Champions League-ah an la dam bawk avangin match khelh hmabak hi a la tam ang reng hle.

Serie A khelh zawh an tum hun hi August thla tawp a ni a, season thar khelh hun atan September thlatir lam an tintuah bawk - an ruahman anga an kal a nih chuan pre season hun an nei mumal thei dawn lo tihna a ni.

Hripui leng vanga an chawlh lailawk hma khan Juve chuan hma an hruai mek a, pahnihna Lazio laka an sanna erawh point khat chauh a ni - an nomawi a la him lo hle tih a chiang; pathumna Inter Milan pawh ngaihthlah theih an la ni bik lo ang.