Stoke City-in Mikel lalut hnai

Championship club Stoke City chuan Chelsea midfielder hlui John Mikel Obi an lalut hnai a, he thuziak i chhiar meuh chuan kum khat chhung atan inremna an nei fel tawh hial ang. 

Kum 33 mi Nigeria captain hlui hian March thla khan Turkish club Trabzonspor chu inhriatthiam tawnnain a chhuahsan a, hemi hnuah hian club dang nei leh tawh loin Premier League kai thar West Brom nen pawh sawizawm an ni. 

Mikel hi English football-ah a mikhual hran lo. Chelsea tan season 11 a khelh chhungin match 372-a khelhsak hman a, Premier League (2), FA Cup (3), League Cup (1), FA Community Shield (1), Champions League leh Europa League (1)-ah a champion pui. 

Kum 2017 khan Stamford Bridge chhuahsanin sum tamna Chinese club Tianjin Teda a zawm a, kum 2019 khan Middlesbrough-ah a lo khel tawh bawk - Championship-ah pawh a mikhual dawn lo tihna a ni. 

Premier League club vantlang ni ṭhin Stoke hian 2019-20 season tawp lama an match liah vawi thum hnehna an chang a, relegation zone chhuahsanin an him hram - season tharah chuan Northern Ireland boss hlui Michael O'Neill hoin relegation battle ni loin Premier League khel tura inchuhna boruak tem phak an tum ang.