President's Cup: Kulikawn Cricket Club an thiam ber

Cricket Association of Mizoram (CAM) hnuaia inelna - President's Cup 2023 chu nimin khan khelh zawh a ni a, tualchhung cricket inelna ngaihhlut zinga miah hian Kulikawn Cricket Club an champion.

Suaka Cricket Ground, Sihhmuia final inkhel hmuhnawmah Kulikawn hian an khingpui Ṭhuampui Chinari chu wicket riatin an hneh a, kum 2018-a Mapuia Mizoram Cricket League (MCL) nomawi an chawi hnuah, tun ṭum hi tualchhung inelnaa an hlawhtlin lehna hmasa a ni.

Ṭhum vawra vannei zawk Ṭhuampui Chinari lamin vuak hmasak an thlang a, over 20 chhunga mi pakua inhloh chungin run 104 an siam. Sahil Sharma chuan run 44 a siam a, thlawptu dang a nei ṭha tawk lo chungin target sang pangngai tak an siam.

Kulikawn lamin target umphak tumin an bei, wicket hmasa ber an hloh hma avangin boruak a danglam hman. Mahse, hun pawimawhah Saidingliana Sailo a rawn ding chhuak, ani hian thi loin run 45 a siam a, run 24 siamtu Sahil Renza chuan a thlawp ṭha bawk.

Mi pahnih chauh inhloh chungin Kulikawn hian an target an thleng a, an target um phak tur hian over 18.3 an hmang. Tun inelna neih laia kal tluang leh team hmuhnawm bik an nih ang ngeiin nomawi an chawi ta a ni.

Kulikawn Cricket Club secretary Michael Hmingthanpuia chuan, "Player zawng zawng an khel ṭha vek a, a bik takin tun tournament kan champion theih nan bowler an che ṭha a, a fielding lam an che ṭha em em bawk," tiin Vanglaini a hrilh.

Season hmasa khan Kulikawn hian President's Cup leh CAM Cup-ah te final an lut a, mahse Zarkawt Lords leh Ramhlun Venglai te hneh loin pahnihna an ni ve ve, kuminah erawh an team tichak turin Lalrempuia leh Saidingliana Sailo te an la lut a, a bul ṭan nan an champion nghal.

An champion theih nan Lalbiaktluanga a pawimawh bawk. Ani hi Kulikawn player pawimawh a ni ṭhin a, second division club Bawngkawn South lamah chhuakin a champion pui a, a club hluiah kir lehin a champion pui leh ta chiah - final atan match of the match a ni hial.

Tournament kharna hunah hian CAM president Lalrochuanga Pachuau chuan thu sawiin, player-te chu tualchhung cricket a duhtawk mai lo turin a fuih a, “Kan theihna hi ram pawnah kan keng zel ang a, huaisen takin midang te hi kan theihna kan entir a ngai, hmasawn loa kan kal chuan BCCI lamin hmasawn lo min ti ang a, funding hi engtik thleng nge kan dawn dawn a hriat loh a, hma kan sawn a ni tih hi kan lantir a ngai ni,” a ti.