Semifinal khel thei zingah Chhinga Veng

Zote Toyota MPL10-ah round 9 khelh zawh a ni a, Chhinga Vengin Aizawl FC 1-0 a hnehin semifinal khel thei zingah an inhlangkai a, I League club erawh panganaah an tla thla thung. Nimin inkhelah Chhinga Veng tan Johny Lalremruata'n goal awmchhun a khung a, Serchhip tlangval hi man of the match-ah thlan a ni.

Aizawl FC hian ni ruk chhungin MPL leh I League match hnih ve ve an khel a, an ṭhat dan bera MPL an khelh theih loh an tuar. I League club hian November 24, Zirtawpni hian table chung bera awm Aizawl FC an hmachhawn dawn a, semifinal khel pha turin chak an mamawh ta hle.

Chhinga Veng thar

Lalsangzuala Hmar kaihhruai Chhingcows-in I Day Football an champion hnuah beisei angin MPL10-ah bul an ṭan lo a, Santosh Trophy leh Mizoram inthlanpui vanga MPL chawlh a nih hnuah Chhinga Veng thar an rawn inlar. Khelmualah Chhingcows hian match hnih a zawnin hnehna an chang a ni ringawt lo a, nikum lama club neitute rawn kirin khelmual pawn lama an harsatna an chingfel.

Nimin inkhelah keeper RS Lallawmzuala a rawn kir a, Chhingcows tan a hunah tak Mizoram keeper a rawn dam a tih theih. Lawma a rawn inlan tak avangin Chhinga Veng starting eleven-ah Santosh Trophy-a Mizoram player pariat an awm a, an ṭha thawkhat tih a chiang.

RG Stadium grass tharah Chhinga Vengin bul ṭan ṭha tawk lo mah se first half tawp lamah chuan team ṭha zawk an ni a, goal chance pawh an nei ṭha. An duhtui luat vangin chance ṭha an hlah a, Johny-a'n hnai tak aṭanga a khung loh chu chance ṭha berah a chhal theih.

Serchhip tlangval Johny-a'n a tihsual rawn siam ṭhain minute 48-naah dinglam aṭanga Zonunmawia cross ṭha chu a tauh goal a, Sanga hote dinhmun ṭhaah a dah. Captain MS Dawngliana team tan a ṭangkai a, PC Lallawmkima a thawkrim a, mual sira awm Lallawmsanga leh Isac Zomuanpuia te an ṭangkai viau bawk. Chutihrualin Chhingcows-in goal an chhuah lo a, tlarhnunga A. Vanlalremruata leh FC Lalhmunmawia te inkawpin fak an phu hle.

AFC an chau

Aizawl FC-in I League-a Namdhari FC an hneh aṭanga darkar 18 pawh tling loah an inkhel lehnghal a, coach Sawmtea tan tih theih a tlem. I League-a inkhel bul ṭan zawng bul an ṭan nawn tir lo a, harsatna belhchhah turin midfielder Lalramsanga leh winger Joseph Lalvenhima te an inhliam.

AFC goal bawh a na tawk lo a, chutihrualin first half leh second half-ah an goal khung offside vangin pawmsak an ni lo. Hun tawp dawn hnaiah bench aṭanga lut Tharpuia hnathawh ṭhat chu substitute Zomuansanga'n a hmang ṭangkai thei lo. I League club an chau a, chutihrualin an player zingah MPL chauha inlan an awm. Heng player-te hian khelhna hmun nghet chan tuma an hun ṭha neih an hmang ṭangkai tawk lo niin a lang bawk.

Aizawl FC hian point an hlawhchhuah zawh loh avangin Chhinga Veng nen an inkarah point hnih a awm ta a, MPL-ah head to head en a nih avangin team pahnih hi season tawpa an point hmuh a inang a nih chuan I League club hi a hnuai zawka awm tur an ni. MPL champion ngun ber AFC hian champion chu sawi loh, semifinal khel lo thei dinhmunah an ding a, MPL10 ngaihnawmna leh hmuhnawmna a belhchhah thung ang.