Buaina karah Argentina an chak!

Lionel Messi leh a ṭhiante inkhel en châkin mi tam tak chu Maracana Stadium-ah an pungkhawm a, inkhelh hmain buaina an hmu hmasa phawt a, chumi hnuah Nicolas Otamendi goal khung an hmu leh bawk.

Nimin zing South America World Cup qualifying inkhelah Argentina chuan Brazil 1-0 in an hneh a, world champion hian qualifier match vawi ruk an khelh chinah point 15 hmuin table hmahruaitu an ni - Brazil erawh point sarih chauh an la neih avangin paruknaah an awm.

Stadium chhunga fans pungkhawmin buaina an siam a, a ṭhelhtu police lamin tiang an lek. Buaina a nasa a, thisen hial a chhuak. Argentina player-te chu khelmual sirah kalin boruak tihdaih an tum - Brazil captain Marquinhos pawh boruak tihdaih tumtu zingah hian a tel.

A reh nghal mai loh avangin Argentina player-te chu khelmual aṭangin an chhuak leh rih a, inkhel ṭan hun pangngaiah an ṭan thei lo. Minute 30 chhung an chawl lailawk phawt a, chumi hnuah an inkhel thei chauh.

Ram pahnihin chak zawk nih an duh takzet a, tharum pawh an hmang nasa. Minute 63-naah Manchester City defender hlui Nicolas Otamendi chuan corner aṭanga ball kal a tauh lut, goal dang lut loin hnehna an chang.

Argentina captain Messi chuan, "Kan mi leh sate an vaw lai kan hmu a, rilru a hrehawm takzet. Khelmual aṭanga inthlakna hmuna let leh kha boruak tihdaih nana ṭha berah kan ngai a, chuvanga khatianga che ta kha kan ni.

"Kan chhungte in lama awmte kan ngaihtuah tel a ngai, a nihna takah chuan tharum thawhna a thlen tawh chuan inkhelh kha a pawimawh ber a ni tawh lo a, mipui himna leh remna kha a pawimawh hmasa tawh zawk," a ti.

Buaina kara hnehna an chan hi Argentina tan chuan a hlu. A chhan chu Brazil hi anmahni muala World Cup qualifier an khelhah an tlawm ngai lo, tun ṭum hi an chak lohna hmasa ber a ni hial, an record duhawm tak chu a tawp.

Argentina an lawm viau laiin Brazil erawh insiamṭhat an ngai, goal mamawh lai takin Newcastle United midfielder Joelinton chu hnawhchhuah a ni a, an tho chhuak thei tawh lo. Tun hnaiah a zawna vawi thum ngawt an tlawm tak avangin hun harsa an tawng mek.

Brazil hian coach nghet an nei rih lo, coach lailawk atan Fernando Diniz an hmang mek a, an forward ṭha Neymar chu hliam vangin a chawl mek bawk. Tunah chuan World Cup qualifier an chawl lailawk dawn, friendly match an khelh tur hoah insiamṭhat an tum ang.

World Cup 2026 hi United States, Mexico leh Canada ten an inthlen ṭawm dawn. Ram inlan tur zat hi 32 aṭangin 48-ah tihpun a ni a, South America ram 10 zinga paruk chu an tling nghal dawn, pasarihnain playoff an khelh a ngai dawn a ni.