Wales aiah Croatia: Euro 2024 khel tur a chiang ta

Thawhlehni zan khan Euro 2024 qualifier pangngai chu khelh zawh a ni a, a tawp zan thil thleng a ngaihnawm - group D aṭanga tlang turin Croatia leh Wales ten beisei an la nei ve ve a, an result an inngaihchan a ṭul ve ve thung.

Wales-in hmahruaitu Turkey an hmachhawn a, tlang turin chak an mamawh - lehlamah Croatia-in Armenia an hmachhawn a, Wales an chak chuan chak an mamawh ve bawk.

A tawi zawnga sawi chuan team pahnihin khingpui result ngaichang chungin an khel a, a tawpah Croatia an vannei ta zawk - an mikhual Armenia chu 1-0 in an hneh a, Turkey nena 1-1 a inhnehtawk Wales tan playoff chu beisei an neihna a ni ta.

Hlauhthawnna

Zagreb khawpuiah Croatia-in chak an mamawh tih inhre chungin inkhel bul an ṭan a, game pawh an thunun nghal hle - inkhel ṭantir lam minute 15 zet chu 75% ball possession nei chungin inkhel an thunun a, goal an khung hma ringawt pawh hian vawi riat shot an nei hman!

Mahse, hetihlai hian inkhel lehlamah Wales-in 1-0 in hma an hruai a, Neco Williams chuan goal hmahruai a khung - khatihlai khan inkhel tawp ta se, Croatia leh Wales te an point hmuh zat a inang ang a, head-to-head a sang zawk Croatia chu tlang tur an ni.

Minute 43-na a ni a, Croatia an lawm ve leh ta thung - Borna Sosa ball cross chu Ante Budimir chuan goal-ah a chantir a, Croatia ngaih a ngam. Armenia an hneh chuan, Wales chak pawh ni se, an tlang tawh dawn tho tih a chiang.

A tawp ta

Osasuna forward Budimir hian an goal hnihna a khungah a inngai a, mahse, foul vangin pawmsak a ni lo thung. Croatia hah tidam zual turin Armenia-in an mikhualna ramah an nawr na thei meuh lo a, inkhel pumpuiah vawi ruk chiah 'shot' an nei a, heng zinga pahnih chiah hi target-ah a kal.

Croatia erawhin vawi 21 ngawt 'shot' an nei a, heng zinga 11 chu goal zawnah a kal - an goal khung zat erawh goal khat chauh a ni a, mahse, goal an chhuah loh miau avangin Euro 2024 khel tura inpetkai nan a tling tawk.

Minute 70-naah Croatia hah a dam zual. Referee Matej Jug chuan sawisel theih takin Wales captain Ben Davies chu Kenan Yildiz lakah penalty a chawitir a, Yusuf Yazici chuan goal-ah a chantir - Wales beiseina a thamral.

Hello Euro

Euro 2024 khel tura an tlin leh tak avangin Croatia hi kum 2004 hnuah European Championship khel turin an la inpettling ziah a, kum 2010 hnuah major tournament an la khel kim vek bawk - khawvela football ram ropui zingah an hming an nem kai mek.

Croatia tan kum 38 mi Luka Modric chu inkhel bul ṭantu zingah a la tel a, Real Madrid midfielder hi a kum tam deuh tawh mah se a thiam ngaiin a la thiam reng a, Croatia tan chuan a thiamna piahlamah a tawnhriat ringawt pawh hi thlamuanpui tham a la ni reng.

Ram tana vawi 172 inlana goal 24 khungtu Modric hi Euro 2024-ah a inlan thei a nih chuan major tournament vawi kua a khelhna tur a ni tawh dawn - World Cup 2018-ah khan an ram team hi final a luhpui a, nikumah khan pathumna an ni bawk.