Nagelsmann pawhin Germany a la siam ṭha thei lo

Germany-in FIFA World Cup group stage vawi hnih an paltlang thei tawh lo a, Euro 2000-ah pawh an chet ṭhat loh bawk avangin insiamṭhat tumin hma an la nasa hle. Bayern Munich nomawi ṭhahnem tak chawipuitu Hansi Flick a hlawhchham a, Bavarians enkawltu hlui tho Julian Nagelsmann an la lut.

Naglesmann hnuaiah match hmasa berah USA hneh mah se Mexico nen an inhnehtawk zui a, November thla international break-ah phei chuan vawi hnihah vawi hnih an chak lo. Germany hian Turkey an hneh loh hnuin an ram ṭhenawm Poland 2-0 in an hneh lo.

Poland coach Ralf Rangnick hi Manchester United manager hlui a ni a, inkhelh hmain Germany nena an inkhel tur chu 'derby' a nih thu a sawi a, friendly match satliah a ni lo tiin a sawi theih.

Ernst Happel Stadion, Leopoldstadt-ah friendly match hi khelh a ni a, Austria-a stadium lian ber a ni. Rangnick-a hote hi Euro 2024 khel turin an inpettling tawh a, Germany an hmachhawn hmain Estonia an hneh bawk.

Germany lakah pawh Austria an che ṭha a, Christoph Baumgartner hmangin chance ṭha an nei hmasa zawk. Michael Gregoritsch pawhin chance ṭha bik a nei a, keeper Kevin Trapp chiah a hmachhawn hnuah a pet goal thei lo.

Austria-in inkhel an thunun rah an seng a, minute 29-naah Kevin Trapp pek chu Borussia Dortmund tana khel mek Marcel Sabitzer chuan box chhungah la lutin goal kilah a pet lut. Keeper Trapp-a'n a en liam ringawt.

Second half-ah pawh Germany an insiamṭha thei lo a, Leroy Sane-a'n wing back Phillipp Mwene a titlu. Mwene hian Sane hi a an khum zeuh avangin German winger hi a insum zo lo a, kut a thawh - minute 29-naah hnawhchhuah a ni.

Austria-in an tam zawk tih an lantir a, Germany-in si phurh sut thei loin goal venhim hna an thawk zawk. Baumgartner-a'n minute 73-naah Mats Hummels paltlangin Austria goal hnihna a khung a, goal dang luh belh loin 2-0 in inkhel a tawp.

Nagelsmann hian result ṭha duhin khelh dan thar a rawn duang ngei a, chung zinga langsar chu left wing back-ah Kai Havertz a chhawr. Havertz hi left back ṭha ber niin a lang lo a, tuna zawhna awm chu Nagelsmann hi Germany tana ṭha ber a ni em, tih hi a ni.